సిగరెట్ మానేసే ఉద్యోగులకు టిజి వెంకటేష్ బంపర్ ఆఫర్

హైదరాబాద్: సిగరెట్ తాగడం మానేసే ఉద్యోగులకు మైనర్ ఇర్రిగేషన్ శాఖ మంత్రి టిజి వెంకటేష్ బంపర్ ఆఫర్ ఇచ్చారు. మైనర్ ఇర్రిగేషన్ మంత్రిగా ఆయన శనివారం పదవీ బాధ్యతలు స్వీకరించారు. ఈ సందర్భంగా ఆయన మీడియా ప్రతినిధులతో మాట్లాడారు. తన శాఖలో సిగరెట్ తాగడం మానేసే ఉద్యోగులకు వ్యక్తిగతంగా తాను అలవెన్స్ ఇస్తానని ప్రకటించారు. సిగరెట్ మానేస్తున్నట్లు ఉద్యోగులు డిక్లరేషన్ ఇవ్వాల్సి ఉంటుందని, అలా డిక్లరేషన్ ఇచ్చేవారికి అలవెన్స్ ఇస్తానని ఆయన చెప్పారు. మంత్రిగా తనకు వచ్చే 20 వేల రూపాయలతో పాటు కొంత సొంత సొమ్మును ఈ అలవెన్స్ కోసం వెచ్చిస్తానని ఆయన చెప్పారు. తన ఆరోగ్యంతో పాటు తన శాఖలో పనిచేసే ఉద్యోగుల ఆరోగ్యం కూడా బాగుండాలనేది తన అభిమతమని, అందుకే తన సంస్థల్లో ఇస్తున్నట్లుగానే తన శాఖలోని ఉద్యోగులకు కూడా అలవెన్స్ ఇవ్వాలని నిర్ణయించుకున్నానని ఆయన చెప్పారు.

పదవీ బాధ్యతలు స్వీకరించిన వెంటనే ఆయన రాష్ట్రంలోని మూడు ప్రాంతాలకు చెందిన మూడు ప్రధాన ఫైళ్లపై సంతకాలు చేశారు. తనకు రాష్ట్రంలోని మూడు ప్రాంతాలు కూడా సమానమేనని ఆయన చెప్పారు. తాము నెలకొల్పిన రాయలసీమ హక్కుల వేదిక రాజకీయ సంస్థ కాదని ఆయన స్పష్టం చేశారు. తనకు మంత్రిగా సేవలు అందించాలనే ఆశ ఉండేదని, ఆ ఆశ ఇప్పుడు నెరవేరిందని ఆయన చెప్పారు. తనకు మైనర్ ఇర్రిగేషన్ శాఖ అంటే ఇష్టమని ఆయన చెప్పారు.