వచ్చే నెలలో కిరణ్ కుమార్ రెడ్డి మంత్రివర్గంలో చిరంజీవి?

హైదరాబాద్: చిరంజీవి ప్రజారాజ్యం పార్టీ వచ్చే నెలలో ముఖ్యమంత్రి కిరణ్ కుమార్ రెడ్డి ప్రభుత్వంలో చేరే అవకాశాలున్నట్లు ప్రచారం జరుగుతోంది. కిరణ్ కుమార్ రెడ్డి తొలి మంత్రివర్గ ఏర్పాటు సమయంలోనే ప్రభుత్వంలో చేరాలని చిరంజీవి అనుకున్నప్పటికీ ఊహించని ఆటంకాలు ఎదురయ్యాయి. పార్టీలోని ఓ వర్గం తీవ్రంగా వ్యతిరేకించడం వల్ల, కర్ణాటక మంత్రి గాలి జనార్దన్ రెడ్డి తన పార్టీ శాసనసభ్యులను చీల్చే ప్రమాదం ఉన్నందువల్ల ఆయన మంత్రి వర్గంలో చేరాలనే నిర్ణయాన్ని వాయిదా వేసుకున్నట్లు చెబుతున్నారు. పైగా, శ్రీకృష్ణ కమిటీ నివేదిక వచ్చిన తర్వాత ఏ నిర్ణయమైనా తీసుకుంటే బాగుంటుందని కూడా చిరంజీవి అభిప్రాయపడినట్లు చెబుతున్నారు. శ్రీకృష్ణ కమిటీ నివేదిక వచ్చిన తర్వాత పరిస్థితులను చూసి మంత్రివర్గంలో చేరాలని ఆయన అనుకుంటున్నట్లు ఊహాగానాలు చెలరేగుతున్నాయి.

ప్రజారాజ్యం పార్టీకి 3 మంత్రి పదవులు, రెండు కార్పోరేషన్ పదవులు, రెండు ఎమ్మెల్సీలు ఇవ్వడానికి సూత్రప్రాయంగా అంగీకారం కుదిరినట్లు తెలుస్తోంది. అయితే, నాలుగు మంత్రి పదవుల కోసం చిరంజీవి పట్టుబడుతున్నట్లు సమాచారం. ఉప ముఖ్యమంత్రి పదవి నియామకం కూడా చిరంజీవి నిర్ణయం వల్లనే ఆగిపోయినట్లు చెబుతున్నారు. వచ్చే నెలలో ప్రజారాజ్యం పార్టీలో చేరితే ఉప ముఖ్యమంత్రి పదవి చిరంజీవికి ఇవ్వాల్సి ఉంటుందనే అభిప్రాయంతో ఆ నియామకాన్ని ఆపినట్లు తెలుస్తోంది. కాగా, ఆరుగు శాసనసభ్యులు, సీనియర్ నాయకులు కొంత మంది ప్రభుత్వంలో చేరాలనే నిర్ణయాన్ని వ్యతిరేకిస్తునట్లు చెబుతున్నారు.