ఉప ఎన్నికల్లో వైయస్ జగన్ పై పోటీకి డిఎల్ రవీంద్రారెడ్డి సై!

తిరుపతి: అధిష్టానం అదేశిస్తే కడప జిల్లాలో జరిగే ఉప ఎన్నికల్లో పోటీకీ సిద్ధమని వైద్య, ఆరోగ్య శాఖ మంత్రి డిఎల్ రవీంద్రారెడ్డి సోమవారం తిరుపతిలో అన్నారు. మాజీ పార్లమెంటు సభ్యుడు వైయస్ జగన్మోహన్ రెడ్డి పార్టీని వీడటం వల్ల ఎలాంటి నష్టం లేదని ఆయన చెప్పారు. కిరణ్ కుమార్ రెడ్డి ప్రభుత్వానికి ఎలాంటి ఢోకా లేదని ప్రకటించారు. మంత్రివర్గంలో ఎలాంటి అసంతృప్తి లేదన్నారు.

కాగా డిఎల్ రవీంద్రారెడ్డి మాట్లాడేటప్పుడు జగన్ పేరును ప్రస్తావించలేదు. పార్టీలోనుండి ఒకరిద్దరు వెళ్లినంత మాత్రాన పార్టీకి వచ్చే నష్టం లేదని పరోక్షంగా జగన్ ఉద్దేశించి అన్నారు. కాంగ్రెస్ సముద్రం వంటిదన్నారు. అయితే పులివెందుల శాసనసభ, కడప పార్లమెంటు ఏ స్థానం నుండి పోటీ చేస్తారో చెప్పలేదు. కడప జిల్లాలో జగన్ పూర్తిగా వ్యతిరేకి అయిన డిఎల్ జగన్ దెబ్బతీయాలనే పోటీ చేస్తానని ప్రకటిస్తున్నట్టు తెలుస్తోంది. డిఎల్ కు అధిష్టానం మద్దతు సైతం ఉండటం గమనించదగ్గ విషయం.