నాన్న పేరు ప్రస్తావించవద్దంటే రాజీనామా చేస్తానని చెప్పా: పురంధేశ్వరి

హైదరాబాద్: నాన్న ఎన్టీ రామారావు పేరు ప్రస్తావించవద్దంటే రాజీనామా చేస్తానని తాను కాంగ్రెసు అధ్యక్షురాలు సోనియా గాంధీకి చెప్పినట్లు కేంద్ర మంత్రి దగ్గుబాటు పురంధేశ్వరి చెప్పారు. నాన్నపై తనకు ప్రేమాభిమానాలున్నాయని, ఆయన పేరు ప్రస్తావించకుండా ఉండలేనని ఆమె అన్నారు. కమ్మ సంఘం సర్వసభ్య సమావేశం, వనభోనత్సవ కార్యక్రమంలో ఆమె ఆదివారం మాట్లాడారు. తాను ప్రతిచోటా నాన్న పేరు ప్రస్తావిస్తున్నానని కాంగ్రెసు నాయకులు సోనియా దృష్టికి తీసుకుని వెళ్లారని, అలా చేయపద్దని సోనియా తనకు చెప్పారని, అయితే తాను రాజీనామానైనా చేస్తాను గానీ నాన్న పేరు ప్రస్తావించకుండా ఉండలేనని చెప్పానని, తనను సోనియా అర్థం చేసుకున్నారని ఆమె వివరించారు.

నాన్న ఆశీస్సులు ఉన్నంత వరకు తాను ఒంటరిని కాదని ఆమె అన్నారు. మంత్రిగా తనకు ఇబ్బందులు ఎదురైన ప్రతిసారీ ప్రధాని మన్మోహన్ సింగ్ తండ్రిలా సూచనలిస్తున్నారని, మన్మోహన్, సోనియాల ఆశీర్వాదం వల్లనే తాను ఈ స్థాయిలో ఉన్నానని ఆమె చెప్పారు. కులాభిమానం ఉండాలి గానీ అది దురభిమానంగా మారకూడదని ఆమె అన్నారు. లోకసభ సభ్యురాలిగా తన భార్య పురంధేశ్వరి గెలుస్తుందని తాను అనుకోలేదని, తాను బయట ఉంటే ఆమె ఇంట్లో ఉండేదని, ఇప్పుడు పరిస్థితి తారుమారైందని కాంగ్రెసు శాసనసభ్యుడు దగ్గుబాటి వెంకటేశ్వర రావు చమత్కరించారు.