కె చంద్రశేఖర రావు ఎఫెక్ట్: పాఠశాలల సెలవులకు గండి

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు భయంతో తెలంగాణలోని పాఠశాలల విద్యార్థుల సెలవులకు కోత పడింది. క్రిస్ట్మస్ పర్వదినం సందర్భంగా డిసెంబర్ లో విద్యాసంస్థలకు ప్రత్యేకంగా సెలవులు ఇవ్వడం సంప్రదాయంగా వస్తోంది. కానీ ఈసారి విద్యార్థులకు సెలవులు ఉండే అవకాశం లేదు. సెయింట్ ఆన్స్ వంటి క్రైస్తవ విద్యాసంస్థలు కూడా రెండు మూడు రోజులు మాత్రమే సెలవులు ఇస్తున్నాయి. ఈ నెల 31వ తేదీన శ్రీకృష్ణ కమిటీ నివేదిక ఇచ్చిన తర్వాత తెలంగాణలో పరిస్థితి ఎలా ఉంటుందో చెప్పలేని స్థితి ఏర్పిడింది. తెలంగాణలో ఆందోళనలు ఉధృతమైతే పాఠాలు పూర్తి చేయడం కష్టంగా ఉంటుంది. దీంతో పాఠశాలల యాజమాన్యాలు డిసెంబర్ సెలవులను రద్దు చేసి పాఠాలు పూర్తి చేసే పనిలో మునిగిపోతున్నాయి.

నిరుడు డిసెంబర్ నెలలో చెలరేగిన ఆందోళనల అనుభవాలను దృష్టిలో పెట్టుకుని విద్యాసంస్థల యాజమాన్యాలు వ్యవహరిస్తున్నాయి. డిసెంబర్ లో తరుచుగా విద్యాసంస్థలు బంద్ పాటించాల్సిన అనివార్యతలో పడ్డాయి. కాగా, ఉస్మానియా విశ్వవిద్యాలయం విద్యార్థులు మాత్రం డిసెంబర్ లో సెమిస్టర్ పరీక్షలు నిర్వహించాలనే నిర్ణయాన్ని వ్యతిరేకిస్తూ ఆందోళనకు దిగారు. డిసెంబర్ లోనే పరీక్షలు పూర్తి చేసి డిసెంబర్ 31వ తేదీలోగా విద్యార్థులను ఇళ్లకు పంపించేయాలనే ఉద్దేశంతో ఉస్మానియా పాలకవర్గాలున్నాయి. దీంతో డిసెంబర్ తర్వాత ఆందోళనల ఉధృతిని తగ్గించవచ్చుననేది ఆలోచన. నిరుడు డిసెంబర్ తలెత్తిన తీవ్ర పరిమాణాలను దృష్టిలో ఉంచుకుని ఉస్మానియా పాలక మండలి ఆ ఆలోచన చేస్తోంది.