కెసిఆర్ పై నిప్పులు చెరిగిన ఎమ్మార్పీయస్ నేత మందకృష్ణ మాదిగ

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుపై మాదిగ రిజర్వేషన్ పోరాట సమితి (ఎమ్మార్పీయస్) నేత మందకృష్ణ మాదిగ నిప్పులు చెరిగారు. ఎస్సీ రిజర్వేషన్ల వర్గీకరణను కెసిఆర్ సమర్థించకపోవడాన్ని ఆయన తప్పు పట్టారు. నాలుగు రోజులుగా తాను నిరాహార దీక్ష చేస్తున్నా పరామర్శకు కెసిఆర్ రాకపోవడాన్ని విమర్సించారు. మాదిగలు తెలంగాణకు మద్దతిస్తున్నా కెసిఆర్ ఎస్సీ రిజర్వేషన్ల వర్గీకరణను సమర్థించడం లేదని ఆయన అన్నారు.

ఎస్సీ రిజర్వేషన్ల వర్గీకరణపై కెసిఆర్ ద్వంద్వ వైఖరి అవలంబిస్తున్నారని ఆయన విమర్శించారు. ఈ నెల 9వ తేదీన వరంగల్ లో జరిగే తెరాస తెలంగాణ మహాగర్జనకు వెళ్లవద్దని ఆయన మాదిగలకు విజ్ఞప్తి చేశారు. తెలంగాణ ప్రజా ఫ్రంట్ నేత గద్దర్ ఈ నెల 9వ తేదీన హైదరాబాదులోని నిజాం కళాశాల మైదానంలో నిర్వహిస్తున్న సభకు వెళ్లాలని ఆయన పిలుపునిచ్చారు. ఎస్సీ రిజర్వేషన్ల వర్గీకరణ వివాదాస్పద అంశమని తెలంగాణ రాజకీయ జెఎసి అనడాన్ని ఆయన తప్పు పట్టారు.