వైయస్ రాజశేఖర రెడ్డి అవినీతిలో సోనియాకు వాటా ఉందా: అంబటి

హైదరాబాద్: దివంగత ముఖ్యమంత్రి వైయస్ రాజశేఖరరెడ్డి తన హయాంలో భారీ కుంభకోణాలకు పాల్పడ్డాడంటే ఆ కుంభకోణాల్లో ఏఐసిసి అధ్యక్షురాలు సోనియాగాంధీకి సైతం పాత్ర ఉందా అని మాజీ పార్లమెంటు సభ్యుడు వైయస్ జగన్మోహన్ రెడ్డి వర్గం నేత అంబటి రాంబాబు ఓ టీవీ ఛానల్ కార్యక్రమంలో పేర్కొన్నారు. సోనియాకు తెలియకుండా వైయస్ కుంభకోణాలు ఉండవన్నారు. అంటే ఆమె పాత్ర కూడా ఉందనే విషయం కాంగ్రెసు వాళ్లు తెలుసుకోవాలని చెప్పారు. ఒకవేళ సోనియా పాత్ర లేకున్నా వైయస్ కుంభకోణాల్ని చూస్తూ అధిష్టానం ఏం చేస్తుందని ప్రశ్నించారు.

వైయస్ ను అవినీతి ముఖ్యమంత్రి అని విహెచ్ లాంటి సీనియర్ నాయకులు అంటుంటే ముఖ్యమంత్రి కిరణ్ కుమార్ రెడ్డి వైయస్ రాజశేఖరరెడ్డి బాటలో నడుస్తానని చెబుతున్నారని ఈ ద్వంద్వ నీతి ఏమిటన్నారు. వైయస్ అవినీతి పరుడు అయితే ఆయన బాటలో నడవాల్సిన అవసరం కాంగ్రెసు కు ఏమిటన్నారు. వైయస్ ను విహెచ్ తోపాటు ప్రతిపక్ష తెలుగుదేశం పార్టీ అధ్యక్షుడు చంద్రబాబునాయుడు కూడా అవినీతిపరుడు అన్నారన్నారు. అవినీతి పరుడు అనడం కాదని, ప్రభుత్వం వారి చేతుల్లోనే ఉంది కాబట్టి వైయస్, జగన్ అవినీతి నిరూపించాలని ఆయన డిమాండ్ చేశారు.