రేపు సిఎం కిరణ్ కుమార్ రెడ్డి ఇంటిని ముట్టడిస్తాం: మందకృష్ణ మాదిగ

హైదరాబాద్: ఎస్సీ రిజర్వేషన్ల వర్గీకరణపై ఢిల్లీకి అఖిల పక్ష ప్రతినిధులను తీసుకుని వెళ్లే విషయంపై మాదిగ రిజర్వేషన్ పోరాట సమితి (ఎమ్మార్పీయస్) నేత మందకృష్ణ మాదిగ మరోసారి ముఖ్యమంత్రి కిరణ్ కుమార్ రెడ్డికి అల్టిమేటం ఇచ్చారు. రేపటిలోగా ఈ విషయంపై ముఖ్యమంత్రి స్పష్టమైన హామీ ఇవ్వాలని, అలా ఇవ్వకపోతే రేపు ముఖ్యమంత్రి ఇంటిని ముట్టడిస్తామని ఆయన హెచ్చరించారు. ప్రదర్సనగా బయలుదేరి మూడు వైపుల నుంచి ముఖ్యమంత్రి ఇంటిని ముట్టడిస్తామని ఆయన చెప్పారు. పోలీసులను ప్రతిఘటించి తమ కార్యకర్తలు ముఖ్యమంత్రి ఇంటికి చేరుకుంటారని ఆయన చెప్పారు.

ఈసారి పోలీసుల లాఠీల దెబ్బలు తినడానికి తమ కార్యకర్తలు సిద్ధంగా ఉండబోరని, పోలీసులను ప్రతిఘటిస్తారని, దానివల్ల సంభవించే పరిణామాలకు ముఖ్యమంత్రే బాధ్యత వహించాల్సి ఉంటుందని ఆయన అన్నారు. కాగా, మందకృష్ణ మాదిగ నిరాహార దీక్షకు మద్దతుగా హైదరాబాదులోని అంబేడ్కర్ విగ్రహం వద్ద ఎమ్మార్పీయస్ కార్యకర్తలు రాస్తారోకో నిర్వహించారు. వారిని పోలీసులు అరెస్టు చేశారు. హైదరాబాదులోని ఉస్మానియా విశ్వవిద్యాలయంలో నలుగురు విద్యార్థులు నిరాహార దీక్షకు దిగారు.