జగన్ ను కట్టడి చేయలేక రాజీనామా చేశాననడం సరి కాదు: రోశయ్య

హైదరాబాద్: వైయస్ జగన్ ను కట్టడి చేయలేక తాను రాజీనామా చేశాననే మాటల్లో నిజం లేదని మాజీ ముఖ్యమంత్రి కె. రోశయ్య చెప్పారు. ముఖ్యమంత్రి పదవికి రాజీనామా చేయాలనేది తన సొంత నిర్ణయమని, ఇందులో ఎవరి ఒత్తిడీ లేదని ఆయన అన్నారు. ఓ తెలుగు టీవీ చానెల్ ప్రతినిధితో ఆయన మాట్లాడారు. వైయస్ జగన్ వెళ్లిపోవడం వల్ల తాత్కాలికంగా కాంగ్రెసు పార్టీకి నష్టమేనని ఆయన అన్నారు. పార్టీలో ఉంటే వైయస్ జగన్ కు మంచి జరిగేదని, పార్టీకి మేలు జరిగేదని ఆయన అన్నారు. కాంగ్రెసు వటవృక్షమని, పార్టీ నుంచి వెళ్లిపోయిన హేమాహేమీలే తిరిగి వచ్చారని ఆయన అన్నారు.

ముఖ్యమంత్రిగా కిరణ్ కుమార్ రెడ్డి మొదటి వారంలోనే ఇబ్బందులు ఎదుర్కున్నారని, సమర్థంగా ముందుకు సాగుతారని ఆశిస్తున్నానని ఆయన అన్నారు. ముఖ్యమంత్రి అందరినీ కలుపుకుని పోతారని ఆయన చెప్పారు. 2014 ఎన్నికలే లక్ష్యంగా ముందుకు సాగాలని ఆయన అన్నారు. ఆ ఎన్నికల్లో పార్టీ గెలుస్తుందని, రాహుల్ ప్రధాని అవుతారని, రాష్ట్రంలో పార్టీ అధికారంలోకి వస్తుందని ఆయన అభిప్రాయపడ్డారు.