లగడపాటి రాజగోపాల్ సర్వేపై అనుమానాలున్నాయి: వర్ల రామయ్య

హైదరాబాద్: విజయవాడ పార్లమెంటు సభ్యుడు లగడపాటి రాజగోపాల్ చేసిన సర్వేలు ఈవీఎంలపై అనుమానాలు రేకెత్తిస్తున్నాయని తెలుగుదేశం పార్టీ సీనియర్ నాయకుడు వర్ల రామయ్య బుధవారం విలేకరులతో అన్నారు. ఎన్నికల సమయంలో లగడపాటి తాను సర్వే చేపించినట్టు చెప్పాడని ఆ సర్వేలో కాంగ్రెస్ పార్టీ గెలుస్తుందని చెప్పాడని, తెలుగుదేశం పార్టీ ఓడిపోతుందని చెప్పాడని ఆయన మాటను బట్టి ఈవీఎంలలో ఏదో మతలబు ఉందని స్పష్టమవుతుందన్నారు. లగడపాటి సర్వేలు నిజమయ్యయన్నారు.

ఆయన సర్వేలను చూస్తుంటే ట్యాంపరింగుకు అవకాశముందని అనుమానాలు వస్తున్నాయన్నారు. ఎన్నికల సంఘం ఈవీఎంల పరిస్థితులు, స్థితిగతులపై ఎన్నికల సంఘం శ్వేత పత్రం విడుదల చేయాలని వర్ల డిమాండు చేశారు. ఈవీఎంలలో ఎలాంటి ట్యాంపరింగులకు అవకాశం లేదని ఎన్నికల సంఘం నిరూపించి ప్రజలలో విశ్వాసం నింపాలన్నారు.