మందకృష్ణను సైలెంట్ గా చంపేందుకు కుట్ర చేస్తున్నారు: గద్దర్

హైదరాబాద్: ఎస్సీ వర్గీకరణ కోసం ఆమరణ నిరాహార దీక్ష చేపట్టిన మందకృష్ణ మాదిగను కేంద్ర, రాష్ట్ర ప్రభుత్వాలు సైలెంటుగా చంపాలని నిశ్చయించుకున్నట్టుగా ఉందని తెలంగాణ ప్రజా ఫ్రంట్ కన్వీనర్, ప్రజా గాయకుడు గద్దర్ గురువారం ఆరోపించారు. ఐదు రోజులుగు మందకృష్ణ ఆమరణ నిరాహార దీక్ష చేపట్టినప్పటికీ ఆటు కేంద్ర ప్రభుత్వంగానీ, ఇటు రాష్ట్ర ప్రభుత్వం గానీ పట్టించుకోకుండా నిర్లక్ష్యంగా వ్యవహరిస్తున్నాయన్నారు. మందకృష్ణకు ఏమైనా అయితే చూస్తూ ఊరుకోమని ఆయన హెచ్చరించారు. ఆస్పత్రిలో నిరాహార దీక్ష చేస్తున్న మందకృష్ణ మాదిగను ఆయన గురువారం పరామర్శించారు.

ప్రభుత్వం వర్గీకరణపై వెంటనే స్పందించాలన్నారు. వర్గీకరణ బిల్లు సమస్య కాబట్టి మందకృష్ణ బాధ్యత ప్రభుత్వాలదేనని చెప్పారు. తెలంగాణ బిల్లుతో పాటు ఎస్సీ వర్గీకరణ బిల్లును కూడా ప్రభుత్వం చట్టసభల్లో ప్రవేశపెట్టాలని డిమాండు చేశారు. మందకృష్ణకు తన పూర్తి మద్దతు ప్రకటిస్తున్నట్టు గద్దర్ చెప్పారు. కాగా ప్రత్యేక తెలంగాణ కోసం హైదరాబాదులోని ఎన్టీఆర్ స్టేడియంలో ఏర్పాటు చేసిన బహిరంగ సభకు తెలంగాణవాదులు అందరూ రావాలని కోరారు.