పులివెందుల, కడప సీట్లలో లోకసత్తా పోటీ చేస్తుంది: జయప్రకాష్

విశాఖపట్నం: కడప పార్లమెంటు సీటుకు, పులివెందుల శాసనసభా నియోజకవర్గానికి జరిగే ఉప ఎన్నికల్లో తమ పార్టీ పోటీ చేస్తుందని లోకసత్తా అధ్యక్షుడు జయప్రకాష్ నారాయణ ప్రకటించారు. సంక్షేమ, అభివృద్ధి కార్యక్రమాలను బట్టి వైయస్ జగన్ కొత్త పార్టీ మనుగడ ఉంటుందని ఆయన గురువారం మీడియా ప్రతినిధుల సమావేశంలో అభిప్రాయపడ్డారు. రాజకీయ విలువలకు కట్టుబడి ఉండాలనే ఉద్దేశంతో ఆ రెండు సీట్లలో తాము పోటీ చేయాలని నిర్ణయించుకున్నట్లు ఆయన తెలిపారు.

ప్రజల విశ్వాసం పొందిన, సమర్థుడైన అభ్యర్థులను ఈ రెండు స్థానాల్లో పోటీకి దించాల్సి ఉంటుందని, అనామకులను పోటీకి దించితే అమ్ముడు పోయే అవకాశం ఉంటుందని ఆయన అన్నారు. పులివెందుల నుంచి వైయస్సార్ సతీమణి వైయస్ విజయలక్ష్మి, కడప లోకసభ స్థానం నుంచి వైయస్ జగన్ పోటీకి దిగాలని నిర్ణయించుకున్న విషయం తెలిసిందే.