తెలంగాణ రాష్ట్రాన్ని వెంటనే ఏర్పాటు చేయండి: నాగం జనార్దన్ రెడ్డి

హైదరాబాద్: తెలంగాణ రాష్ట్ర ఏర్పాటుకు వెంటనే పార్లమెంటులో బిల్లు ప్రవేశపెట్టాలని తెలుగుదేశం తెలంగాణ ఫోరం కన్వీనర్ నాగం జనార్దన్ రెడ్డి కేంద్ర ప్రభుత్వాన్ని డిమాండ్ చేశారు. తెలంగాణ డిక్లరేషన్ డే సందర్భంగా తెలుగుదేశం తెలంగాణ ఫోరం నాయకులు గురువారం గన్ పార్కు వద్ద తెలంగాణ అమరవీరులకు నివాళులు అర్పించారు. సీమాంధ్ర, తెలంగాణ ప్రజల మధ్య చీలిక వచ్చిందని, ప్రజలను కలపడం సాధ్యం కాదని, అందువల్ల భౌగోళికంగా రాష్ట్రాన్ని విభజించడమే సరైందని నాగం జనార్దన్ రెడ్డి ఈ సందర్భంగా అన్నారు. తెలంగాణకు అనుకూలంగా తమ పార్టీ ప్రణబ్ ముఖర్జీ కమిటీకి నివేదిక ఇచ్చిందని ఆయన గుర్తు చేశారు. తెలంగాణ ఉద్యమకారులపై పెట్టిన కేసులను ఎత్తేయాలని ఆయన డిమాండ్ చేశారు. తెలంగాణ రాష్ట్రాన్ని సాధించేవరకు తాము పోరాటం చేస్తామని ఆయన చెప్పారు.

తెలంగాణ సాధనకు సంబంధించి తెలంగాణ రాష్ట్ర సమితి (తెరాస) వైఖరిలో మార్పు రావాలని తెలుగుదేశం శాసనసభ్యుడు ఎర్రబెల్లి దయాకర రావు డిమాండ్ చేశారు. తెలంగాణ సాధన విషయంలో తెరాసలో మార్పులో రావాలని ఆయన అన్నారు. తెరాస అధ్యక్షుడు కె చంద్రశేఖర రావు ఒంటెత్తు పోకడల వల్ల తెలంగాణ రాష్ట సాధన వెనక్కి పోతోందని ఆయన అన్నారు. తెలంగాణ ఉద్యమకారులపై పెట్టిన కేసుల వ్యవహారాన్ని తాము శాసనసభలో లేవనెత్తుతామని ఆయన అన్నారు. ఈ సందర్భంగా తెరాస కార్యకర్తలు తెలుగుదేశం తెలంగాణ నాయకులను నిలదీశారు. వారితో వాగ్వివాదానికి దిగారు.