అహ్మద్ పటేల్ పిలుపు: దాసరి పాత్రకు చిరంజీవి వ్యతిరేకత?

హైదరాబాద్: తమ పార్టీ కాంగ్రెసుతో పొత్తు పెట్టుకునే విషయంలో ప్రముఖ దర్శక నిర్మాత, మాజీ కేంద్ర మంత్రి దాసరి నారాయణ రావు పాత్రను ప్రజారాజ్యం పార్టీ అధ్యక్షుడు చిరంజీవి వ్యతిరేకిస్తున్నట్లు ప్రచారం జరుగుతోంది. చిరంజీవిని కాంగ్రెసు అధ్యక్షురాలు సోనియా గాంధీ రాజకీయ సలహాదారు అహ్మద్ పటేల్ అహ్వానించినట్లు తెలుస్తోంది. రాష్ట్రంలో రాజకీయ సమీకరణాలు మారక ముందే చిరంజీవితో పొత్తును ఖరారు చేసుకునేందుకు కాంగ్రెసు తొందరపడుతోందని, అందులో భాగంగానే చర్చల కోసం ఆహ్మద్ పటేల్ చిరంజీవిని ఢిల్లీకి అహ్వానించారని అంటున్నారు. ఆయితే, దాసరి పాత్ర ఏ మాత్రం ఉన్నా తాను ముందుకు వచ్చేది లేదని చిరంజీవి అహ్మద్ పటేల్ తో చెప్పినట్లు ఊహాగానాలు చెలరేగుతున్నాయి.

కాంగ్రెసు పొత్తుకు చాలా కాలం నుంచి చిరంజీవి ఆసక్తిగానే ఉన్నారు. రేపో మాపో ప్రజారాజ్యం పార్టీ కాంగ్రెసు ప్రభుత్వంలో చేరుతుందనే ఊహాగానాలు కూడా చెలరేగాయి. ప్రజారాజ్యం పార్టీకిచ్చే మంత్రి పదవులు కూడా ఖరారైనట్లు చెప్పారు. అయితే అది ఆచరణ రూపం దాల్చలేదు. ఎడతెరిపి లేకుండా చర్చలు జరిపిన చిరంజీవి చివరకు తాము ప్రభుత్వంలో చేరడం లేదని, నిర్మాణాత్మక ప్రతిపక్షంగానే వ్యవహరిస్తామని చెప్పేశారు. ఈ స్థితిలో మరోసారి చిరంజీవిని కాంగ్రెసు అధిష్టానం చర్చలుక ఆహ్వానించినట్లు చెబుతున్నారు.