రాత్రి కూడా అసెంబ్లీలోనే ఉండాలని తెరాస శాసనసభ్యుల నిర్ణయం

హైదరాబాద్: ఉద్యమాల సందర్భంగా విద్యార్థులపై పెట్టిన కేసులు ప్రభుత్వం వెంటనే ఎత్తివేయాలని, లేదంటే రాత్రి కూడా అసెంబ్లీలోనే ఉండి తాము నిరసన చేపడతామని తెరాస శాసనసభ్యుడు హరీష్ రావు శుక్రవారం అన్నారు. కేసుల ఎత్తివేతపై తెరాస ఆందోళన కారణంగా అంతకుముందు మూడుసార్లు సభ వాయిదా పడింది. తెరాస పట్టువీడక పోవడంతో ఉపసభాపతి సభను శనివారానికి వాయిదా వేశారు. సభ వాయిదా పడటంతో అన్ని పార్టీల నాయకులు బయటకు వెళ్లినప్పటికీ తెరాస వారు మాత్రం హౌస్ లోనే ఉండిపోయారు. కేసుల ఎత్తివేతపై ప్రభుత్వం నుండి స్పష్టమైన ప్రకటన వచ్చే వరకు హౌస్ లోనే ఉంటామని తెరాస శాసనసభ్యులు పేర్కొంటున్నారు.

విద్యార్థులపై లోక్ సత్తా అధినేత జయప్రకాష్ ప్రకాశ్ నారాయణ వ్యాఖ్యలపై హరీష్ రావు ఓ టీవీ ఛానల్లో ఫోన్లో మాట్లాడుతూ విమర్శించారు. జెపి ఎప్పుడూ తెలంగాణ వ్యతిరేకియేనన్నారు. ఆయన తెలంగాణ వ్యతిరేకత ఇంతకుముందు చాలాసార్లు బహిర్గతమయిందన్నారు. మేధావిని అని చెప్పుకునే జెపి తెలంగాణలోని కూకట్ పల్లినుండి పోటీ చేసి ఇక్కడి వారినే కించపరిచేలా వ్యాఖ్యలు చేస్తున్నారన్నారు. విశ్వవిద్యాలయాల్లో విద్యార్థులపై పోలీసులు లాఠీచార్జ్ చేసి రక్తం కళ్ల చూసినప్పుడు మాట్లాడని జెపి విద్యార్థులపై కేసుల విషయంపై మాట్లాడటం గర్హనీయమన్నారు.