కెవిపిపై సురేఖ ఆరోపణలతో వైయస్ జగన్ కు సంబంధం లేదు: పిల్లి

గుంటూరు: రాజ్యసభ సభ్యుడు, దివంగత నేత వైయస్ రాజశేఖర్ రెడ్డి ప్రియమిత్రుడు కెవిపి రామచందర్ రావుపై కాంగ్రెసు శాసనసభ్యురాలు కొండా సురేఖ చేసిన ఆరోపణలతో వైయస్ జగన్ కు సంబంధం లేదని జగన్ వర్గానికి చెందిన మాజీ మంత్రి పిల్లి సుభాష్ చంద్రబోస్ అన్నారు. కెవిపిపై ఆరోపణలు సురేఖ వ్యక్తిగతమని ఆయన శనివారం మీడియా ప్రతినిధులతో అన్నారు. కెవిపిపై సురేఖ ఆరోపణలు వైయస్ జగన్ ను కుంగదీశాయని ఆయన అన్నారు. కెవిపి ఎప్పటికీ వైయస్సార్ కుటుంబానికి శ్రేయోభిలాషేనని ఆయన అన్నారు.

కెవిపిని బ్రోకర్ గా, అవినీతిపరుడిగా వ్యాఖ్యానిస్తూ కొండా సురేఖ శుక్రవారం తీవ్ర ఆరోపణలు చేసిన విషయం తెలిసిందే. వైయస్సార్ పేరును కెవిపి చెడగొట్టారని ఆమె అన్నారు. జలయజ్ఞాన్ని ధనయజ్ఞంగా మార్చి కోట్లాది రూపాయలు దండుకున్నారని ఆమె ఆరోపించారు. వైయస్సార్ మరణంపై కూడా కెవిపిని ఆమె తప్పు పట్టారు. వైయస్సార్ కుటుంబాన్ని చీల్చడానికి కెవిపి కుట్ర చేశారని ఆమె ఆరోపించారు.