ఏ గ్రూపునూ కలవను, పాతపరిచయంతోనే నెహ్రూతో భేటీ: వర్మ

విజయవాడ: బెజవాడ రౌడీలు సినిమా కోసం తాను ఏ గ్రూపును కూడా కలవబోనని ప్రముఖ దర్శకుడు రామ్ గోపాల్ వర్మ చెప్పారు. కాంగ్రెసు నాయకుడు దేవినేని నెహ్రూతో భేటీ అనంతరం శనివారం ఆయన మీడియా ప్రతినిధులతో మాట్లాడారు. పాత పరిచయంతో వ్యక్తిగతంగానే తాను దేవినేని నెహ్రూను కలిసినట్లు ఆయన తెలిపారు. సినిమా టైటిల్ ను మార్చే అవకాశం ఉందని ఆయన చెప్పారు. బెజవాడ రౌడీలు సినిమా విజయవాడ రౌడీయిజం, రాజకీయాలపైనే ఉంటుందని ఆయన చెప్పారు.

తాను రౌడీని కానని దేవినేని నెహ్రూ అన్నారు. తొలుత విజయవాడలో సిపిఐ, సిపిఎంల మధ్య ఆధిపత్య పోరు జరిగేదని, ఆ తర్వాత అది తనపై పడిందని ఆయన అన్నారు. వంగవీటి రంగాతో విభేదాలు రాజకీయపరమైనవేనని ఆయన అన్నారు. తమ మధ్య జరిగింది రౌడీయిజం కాదని, అది ఆధిపత్య పోరు మాత్రమేనని ఆయన అన్నారు.