వైఎస్ జగన్ పార్టీలో చేరుతున్నా, పొన్నూరునుండి పోటీ?

గుంటూరు: మాజీ పార్లమెంటు సభ్యుడు, దివంగత ముఖ్యమంత్రి వైఎస్ రాజశేఖరరెడ్డి తనయుడు వైఎస్ జగన్మోహన్ రెడ్డి పెట్టబోయే పార్టీలో తాను చేరబోతున్నట్లు జిల్లాకు చెందిన తెలుగుదేశం పార్టీ నాయకుడు, మాజీ మంత్రి మాకినేని పెదరత్తయ్య చెప్పినట్లు తెలుస్తోంది. తెదేపా జిల్లా అధ్యక్షుడు ఫోన్ చేసినప్పుడు ఆన స్వయంగా తన నిర్ణయాన్ని ప్రకటించినట్లుగా తెలుస్తోంది. తెలుగుదేశం పార్టీ ఆవిర్భావం నాటి నుంచి పార్టీలో ఉన్నప్పటికీ పార్టీ తనకు సరియైన ప్రాధాన్యం ఇవ్వనందునే పార్టీ మారుతున్నట్లు ఆయన చెప్పారు. గత ఎన్నికల్లో ఆయనకు పార్టీ పోటీచేయడానికి అవకాశం ఇవ్వలేదని, తన పట్ల చూపుతున్న నిరాదరణను నిరసిస్తూ జగన్ పార్టీలో చేరాలని నిర్ణయించుకొన్నానని ఆయన చెప్పారు.

కాగా జగన్ పార్టీలో చేరి వచ్చే ఎన్నికల్లో పొన్నూరు నుంచి పోటీచేయాలని నిర్ణయించుకొన్నానని, ఆ నియోజకవర్గం నుంచి రత్తయ్యను నిలబెట్టడానికి జగన్ తనకు హామీ ఇచ్చినట్లు తెలుస్తోంది. పార్టీని వీడవద్దని ఆయనకు నచ్చచెప్పడానికి పుల్లారావు ప్రయత్నించినా రత్తయ్య ససేమిరా అన్నారు. రత్తయ్యతో మాట్లాడాలనుకొన్న చంద్రబాబు ఈ సమాచారం తెలియడంతో ఆ ప్రయత్నం విరమించుకొన్నట్లు చెబుతున్నారు.