కడపలో వైఎస్ జగన్ పై విహెచ్ పోటీ!: మండిపడ్డ ఎమ్మెల్యే కొండా సురేఖ

హైదరాబాద్: రాజ్యసభ సభ్యుడు, దివంగత ముఖ్యమంత్రి వైఎస్ రాజశేఖరరెడ్డి ఆత్మ బంధువు కెవిపి రామచంద్రారావు చేసిన వ్యాఖ్యలకు కట్టుబడి ఉన్నానని పరకాల శాసనసభ్యురాలు, జగన్ వర్గం కాంగ్రెస్ నేత కొండా సురేఖ అన్నారు. తన వ్యాఖ్యల్లో నిజం ఉందని చెప్పారు. తాను చేసిన వ్యాఖ్యలపై కాంగ్రెస్ అధిష్టానం ఎలాంటి చర్యలు తీసుకున్నా సిద్ధమేనని ప్రకటించారు.వైఎస్ రాజశేఖరరెడ్డిపై ఆరోపణలు చేస్తుంటే స్పందించని వారు ఇప్పుడు స్పందింటమేమిటని ఆమె ప్రశ్నించారు.

తాను మాజీ పార్లమెంటు సభ్యుడు జగన్ వెంటే ఉంటానని ఆమె చెప్పారు. అందులో ఎలాంటి అనుమానాలలకు తావులేదన్నారు. కడప త్వరలో జరిగే ఉప ఎన్నికల్లో వైఎస్ జగన్ పై రాజ్యసభ సభ్యుడు విహెచ్ పోటీ చేస్తారనే కామెంట్ పై ఆమె ఆగ్రహం వ్యక్తం చేశారు. అశేష జనాధరణ ఉన్న జగన్ పై విహెచ్ పోటీ అనడం హాస్యాస్పదం అన్నారు. విహెచ్ ను కడపలో నామినేషన్ కూడా వేయనీయరన్నారు.