వైఎస్ జగన్ వర్గంలోకి కృష్ణా జిల్లా ఎమ్మెల్యే పేర్ని నాని!

విజయవాడ: మాజీ పార్లమెంటు సభ్యుడు, దివంగత ముఖ్యమంత్రి వైఎస్ రాజశేఖరరెడ్డి తనయుడు వైఎస్ జగన్మోహన్ రెడ్డి కృష్ణా జిల్లా పర్యటన కాంగ్రెస్ జిల్లా రాజకీయాల్లో అనూహ్యమార్పులు కలిగే సూచనలు కనిపిస్తున్నాయి. పంట నష్టపోయిన రైతులను పరామర్శించేదుకు మూడు రోజులుగా గుంటూరు, కృష్ణా జిల్లాలో జగన్ పర్యటిస్తున్న విషయం తెలిసిందే. ఆయన గుంటూరు పర్యటనలో ఉన్నప్పుడు తెలుగుదేశం పార్టీకి చెందిన మాకినేని పెదరత్తయ్య జగన్ వైపు వెళతానని పార్టీ అధ్యక్షుడితో చెప్పినట్టు సమాచారం. తాజాగా ఆయన కృష్ణా జిల్లా పర్యటనలో మరింత ఆసక్తికరమైన విషయాలు బయటపడుతున్నాయి.

కృష్ణా జిల్లాకు చెందిన కాంగ్రెస్ శాసనసభ్యుడు పేర్ని నాని వైఎస్ జగన్ వైపు వెళ్లే అవకాశాలు స్పష్టంగా కనిపిస్తున్నాయి. ఇందుకు పేర్ని అభిమానులు, కార్యకర్తలు కూడా ఆయనపై ఒత్తిడి తీసుకు వస్తున్నారు. వైఎస్ జగన్ వర్గం వైపు వెళతామని పేర్ని అనుచరులు ఆయనకు సూచిస్తున్నారంట. దీంతో ఆయన జగన్ వర్గం వైపు వెళ్లేందుకు నిశ్చయించుకున్నట్టు తెలుస్తోంది. పేర్ని మచిలీపట్టణంలో ఆయన అనుచరులతో ఆదివారం సమావేశమై చర్చించారు. జిల్లాలో జగన్ వర్గం వైపు మాజీ శాసనసభ్యులు జలీల్ ఖాన్, జేష్ట రమేష్ బాబు, మేక ప్రతాప్ అప్పారావులు ఉన్నారు. కాగా వైఎస్ జగన్ ఆవనిగడ్డలో పర్యటిస్తున్నారు.