కాంగ్రెస్ నేత దేవినేని నెహ్రూపై సిపిఐ నేత నారాయణ ఫైర్

విజయవాడ: హత్యా రాజకీయాలు ఎవరి కారణంగా ప్రారంభమయ్యాయో అందరికీ తెలుసునని కృష్ణా జిల్లా శాసనసభ్యుడు దేవినేని నెహ్రూపై సిపిఐ నేత నారాయణ విరుచుకు పడ్డారు. దేవినేని నెహ్రూ నోటికి వచ్చినట్లు మాట్లాడుతున్నారని ఆయన నోటిని అదుపులో పెట్టుకోవాలన్నారు. నెహ్రూను ప్రజలు నిజంగానే ఎన్నుకున్నారనుకుంటే, ఆయనకు ప్రజాస్వామ్యంపై నమ్మకం ఉంటే దమ్ముంటే రెఫరెండం ఓటింగుకు సిద్ధం పడాలని సవాలు విసిరారు.

దివంగత ముఖ్యమంత్రి వైఎస్ రాజశేఖరరెడ్డి ఆత్మబంధువు కెవిపి రామచంద్రారావుపై కొండా సురేఖ చేసిన ఆరోపణలకు ఆమె సమాధానం చెప్పాలన్నారు. ఆమె చేసిన ఆరోపణలపై ప్రభుత్వం దర్యాఫ్తు చేయించాలని డిమాండు చేశారు. కొండా సురేఖ చేసినట్లు ఆ అవినీతిలో కేవిపి రామచంద్రారావుకు ఒక్కడికే ఎలా భాగస్వామ్యం ఉంటుందని ఆయన ప్రశ్నించారు. దీనిపై సిబిఐ దర్యాఫ్తు చేస్తేనే నిజాలు బయటపడుతాయన్నారు.