తెలంగాణకు సై అంటే వైయస్ జగన్ పార్టీలో చేరుతా: దామోదర్ రెడ్డి

హైదరాబాద్: మాజీ పార్లమెంటు సభ్యుడు, దివంగత ముఖ్యమంత్రి వైయస్ రాజశేఖరరెడ్డి తనయుడు వైయస్ జగన్మోహన్ రెడ్డి కొత్త పార్టీ పెట్టి తన ముసాయిదాలో తెలంగాణకు అనుకూలంగా కట్టుబడితే తెలంగాణలో కాంగ్రెసు పార్టీ ఉండదని మాజీ మంత్రి దామోదరరెడ్డి ఆదివారం ఆసెంబ్లీ ప్రాంగణంలో అన్నారు. అందరూ జగన్ వెంటే వెళతారన్నారు. జగన్ తెలంగాణకు అనుకూలంగా ఉంటే నేను కూడా జగన్ వెంటే వెళతానని ప్రకటించారు.

అంతకుముందు అసెంబ్లీలో ఆయన విద్యార్థులపై పెట్టిన అక్రమ కేసులను ప్రభుత్వం వెంటనే ఎత్తివేయాలని డిమాండ్ చేశారు. ప్రభుత్వానికి కేసులు ఎత్తివేసే హక్కు ఉంటుందని ఆయన చెప్పారు. విద్యార్థులపై పెట్టిన కేసులు కూడా అక్రమమైనవి కాబట్టి ప్రభుత్వానికి ఉపసంహరించుకునే అవకాశం ఉంటుందన్నారు. చిదంబరం ప్రకటన ప్రకారం అన్ని కేసులు ఎత్తివేయాలని ఆయన డిమాండ్ చేశారు. కేసులను విభాగాలుగా చేసి ఎత్తివేయడాన్ని ఆయన ఆక్షేపించారు.