విద్యార్థులపై పెట్టిన సాధారణ కేసులనే ఎత్తేస్తాం: సబితా ఇంద్రారెడ్డి

హైదరాబాద్: తెలంగాణ, సమైక్యాంధ్ర ఉద్యమాల నేపథ్యంలో విద్యార్థులపై పెట్టిన సాధారణ కేసులను ఎత్తేస్తామని రాష్ట్ర హోం మంత్రి సబితా ఇంద్రారెడ్డి చెప్పారు. ఇప్పటికే 411 మందిపై 182 కేసులను ఎత్తేశామని ఆమె చెప్పారు. ప్రతిపక్షాల పట్టు మేరకు ఆమె సోమవారం శాసనసభలో విద్యార్థులపై పెట్టిన కేసులపై ఓ ప్రకటన చేశారు. నేరాల స్వభావం, తీవ్రతను బట్టి కేసులను పరిశీలిస్తామని ఆమె చెప్పారు. రాష్ట్రవ్యాప్తంగా 1167 కేసులు నమోదైనట్లు ఆమె తెలిపారు. క్షణికావేశంతో విద్యార్థులు హింసాత్మక కార్యకలాపాలకు పాల్పడ్డారని, ఇది భావోద్రేకాలకు సంబంధించిన సున్నితమైన విషయమని, అందువల్ల విద్యార్థులపై కేసులను ఎత్తేయాలని రాజకీయ పార్టీలు, ప్రజా సంఘాలు కోరాయని, దీన్ని దృష్టిలో పెట్టుకుని చర్యలు తీసుకుంటున్నామని ఆమె చెప్పారు.

విద్యార్థులపై పెట్టిన కేసులను మూడు విభాగాలను చేశామని ఆమె చెప్పారు. రైలో రోకో, రాస్తా రోకో, జాతీయ నాయకుల విగ్రహాల ధ్వంసం వంటి సాధారణ తీవ్రత కలిగిన కేసులను ఎత్తేస్తున్నామని ఆమె చెప్పారు. ప్రభుత్వ ప్రైవేట్ ఆస్తుల ధ్వంసం, ప్రభుత్వ అధికారులపై దాడులు వంటి మరింత తీవ్రత గల కేసులను ఎత్తేసే విషయంపై పరిశీలన చేస్తున్నామని ఆమె చెప్పారు. అతి తీవ్రత గల ఇతర కేసులపై కేసులవారీగా దర్యాప్తు చేస్తామని ఆమె చెప్పారు.