దిగి రాని తెరాస శాసనసభ్యులు: మరోసారి అసెంబ్లీ వాయిదా

హైదరాబాద్: విద్యార్థులపై కేసుల ఎత్తివేత విషయంలో హోం మంత్రి సబితా ఇంద్రారెడ్డి, ముఖ్యమంత్రి కిరణ్ కుమార్ రెడ్డి ఇచ్చిన హామీతో సంతృప్తి చెందని తెలంగాణ రాష్ట్ర సమితి (తెరాస) శాసనసభ్యులు మరోసారి శాసనసభా కార్యక్రమాలను అడ్డుకున్నారు. విద్యార్థులపై పెట్టిన అన్ని కేసులనూ ఎత్తేయాల్సందేనని డిమాండ్ చేస్తూ సోమవారం మధ్యాహ్నం స్పీకర్ పోడియాన్ని చుట్టుముట్టారు. ప్రభుత్వానికి వ్యతిరేకంగా నినాదాలు చేశారు. దీంతో సభను డిప్యూటీ స్పీకర్ నాదెండ్ల మనోహర్ 15 నిమిషాల పాటు వాయిదా వేశారు.

ప్రభుత్వంపై విశ్వాసం ఉంచాలని, మిగతా కేసుల ఎత్తివేత దిశగా ప్రభుత్వం సాగుతోందని పంచాయతీరాజ్ శాఖ మంత్రి కె. జానారెడ్డి అంతకు ముందు చెప్పారు. దశలవారీగా కేసుల ఎత్తివేత చర్యలు ఉంటాయని ఆయన చెప్పారు. కేసులు ఎత్తేస్తామని ముఖ్యమంత్రి కిరణ్ కుమార్ రెడ్డి కూడా చెప్పారని ఆయన గుర్తు చేశారు. జానారెడ్డి మాటలను తెరాస సభ్యులు ఖాతరు చేయలేదు. తిరిగి సభ సమావేశమైన తర్వాత పరిస్థితి అదుపులోకి రాలేదు. తెరాస సభ్యులు తమ పట్టు వీడకపోవడంతో సభను డిప్యూటీ స్పీకర్ నాదెండ్ల మనోహర్ రేపటికి వాయిదా వేశారు.