అదే గందరగోళం, కేసుల ఎత్తివేతపై పట్టు: అసెంబ్లీ వాయిదా

హైదరాబాద్: శాసనసభలో వరుసగా మూడో రోజు సోమవారం కూడా గందరగోళం చెలరేగింది. విద్యార్థుల మీద పెట్టిన కేసులను ఎత్తేయాలని డిమాండ్ చేస్తూ తెలంగాణ రాష్ట్ర సమితి (తెరాస) శాసనసభ్యులు పట్టుబట్టారు. తమ డిమాండ్ పై శాసనసభా కార్యక్రమాలను స్తంభింపజేశారు. దాంతో సభను డిప్యూటీ స్పీకర్ నాదెండ్ల మనోహర్ సభను 15 నిమిషాల పాటు వాయిదా వేశారు. సభ ప్రారంభం కాగానే విద్యార్థుల మీద పెట్టిన కేసుల ఎత్తివేతపై తక్షణ చర్చ జరగాలని తెరాస సభ్యులు పట్టుబట్టారు. ఆ వాయిదా తీర్మానంతో పాటు ఇతర ప్రతిపక్షాలు ప్రతిపాదించిన వాయిదా తీర్మానాలను కూడా మనోహర్ తిరస్కరించారు.

విద్యార్థులపై పెట్టిన కేసులను ఎత్తేయాల్సిందేనని తెరాస సభ్యులు పట్టుబట్టారు. అల్లరి చేయడం సరి కాదని, సభను సాగనివ్వాలని ప్రభుత్వ చీఫ్ విప్ మల్లు భట్టి విక్రమార్క విజ్ఞప్తి చేశారు. ప్రధానమైన రైతుల సమస్యను పరిష్కరించాల్సిన అవసరం ఉందని ఆయన చెప్పారు. అయినా వారు వినలేదు. సభ గౌరవాన్ని, సంప్రదాయాన్ని కాపాడాలని డిప్యూటీ స్పీకర్ మనోహర్ సూచించారు. సభను జరగనివ్వాలని ఆయన సూచించారు. అయినా తెరాస సభ్యులు వినలేదు. దీంతో ఆయన సభను 15 నిమిషాల పాటు వాయిదా వేశారు.