వైయస్ జగన్ వెంట ఒకరిద్దరు ఎమ్మెల్యేలే వెళతారు: సిఎం కిరణ్

హైదరాబాద్: మాజీ పార్లమెంటు సభ్యుడు వైయస్ జగన్మోహన్ రెడ్డి వెంట ఆయన చేపడుతున్న ఓదార్పుకు ఒకరిద్దరు శాసనసభ్యులు తప్ప ఎవరూ వెళ్లరని ముఖ్యమంత్రి కిరణ్ కుమార్ రెడ్డి సోమవారం అసెంబ్లీ ప్రాంగణంలో అన్నారు. అయినా జగన్ ది పార్టీకి సంబంధించిన విషయమని చెప్పారు. పార్టీ వేరు, ఓదార్పు వేరు అని అన్నారు. దేని పని అదే చేస్తుందన్నారు. అయినా జగన్ కు మద్దతు పలికే విషయం పార్టీ చూసుకుంటుందని అన్నారు. డిసెంబర్ 31 తర్వాత ఏమవుతుందనే విషయాన్ని తాను వేరే సభ్యున్ని ఉద్దేశించి మాత్రమే చెప్పానన్నారు. డిసెంబర్ 31 తర్వాత ఏమో అవుతుందని మాత్రం చెప్పలేదన్నారు. విద్యార్థులపై కేసులు ఎత్తివేసే విషయంలో ప్రభుత్వం స్పష్టమైన వైఖరితో ఉందని చెప్పారు.

వర్షాలవల్ల పంట నష్ట పోయిన రైతులకు నష్ట పరిహారం పెంపు విషయం అసెంబ్లీ చర్చ తర్వాత పరిశీలిస్తామని ముఖ్యమంత్రి చెప్పారు. పంట దెబ్బతిన్న రైతులకు భీమా చెల్లించే విషయం, రుణాల షెడ్యూల్ ఇన్ పుట్ సబ్సిడీలపై ప్రభుత్వం ప్రస్తుతం దృష్టి పెట్టిందన్నారు. రైతుల సమస్యలపై ప్రభుత్వం చిత్తశుద్దితో ఉందని చెప్పారు. అవకాశం ఉన్న మేర రైతులకు భీమా చెల్లిస్తామన్నారు. పంట నష్టంపై అంచనా వేస్తున్నామని చెప్పారు. రైతులను తప్పకుంటా ఆదుకుంటామన్నారు. తడిసిన ధాన్యానికి మద్దతు ధర వచ్చేలా ప్రయత్నిస్తానని చెప్పారు.