జై బోలో తెలంగాణ సినిమాకు సీమాంధ్ర అడ్డంకులపై ఆగ్రహం

వరంగల్: తెలంగాణ ఉద్యమం, తెలంగాణ పరిస్థితుల నేపథ్యంలో నిర్మించిన జై భోలో తెలంగాణ చిత్రం విడుదలను సీమాంధ్ర చిత్రవర్గాలు అడ్డుకుంటున్నాయని మంగళవారం కాకతీయ విశ్వవిద్యాలయ ఐక్య కార్యాచరణ సమితి విమర్శించింది. సీమాంధ్ర చిత్రవర్గాలు జై భోలో చిత్ర విడుదలను అడ్డుకుంటే బావుండదని హెచ్చరించారు.

సీమాంధ్రులు జై భోలో చిత్రానికి థియేటర్లు ఇవ్వడానికి ఇష్టపడటం లేదని అలా అయితే సీమాంధ్రులు నటించిన చిత్రాలను తెలంగాణలో అడ్డుకుంటామని హెచ్చరించారు. తెలంగాణలోని పరిస్థితుల నేపథ్యంలో నిర్మించిన ఈ చిత్రంలో ప్రముఖ కథానాయకుడు జగపతి బాబు కూడా నటించారు. ఈ చిత్రానికి శంకర్ దర్శకత్వం వహిస్తున్నారు.