ముఖ్యమంత్రి కిరణ్ కుమార్ కు షాక్: జగన్ వెంటే ఉంటానన్న శేషారెడ్డి

హైదరాబాద్‌: తూర్పు గోదావరి జిల్లా అనపర్తి శాసనసభ్యుడు శేషారెడ్డి ముఖ్యమంత్రి కిరణ్ కుమార్ రెడ్డికి షాక్ ఇచ్చారు. వైయస్ జగన్ వైపు వెళ్తున్నట్లు వార్తలు వచ్చిన నేపథ్యంలో శేషారెడ్డితో కిరణ్ కుమార్ రెడ్డి మంగళవారం చర్చలు జరిపారు. వైయస్ జగన్ వైపు వెళ్లవద్దని నచ్చజెప్పేందుకు ప్రయత్నించారు. అయితే, శేషారెడ్డి అందుకు అంగీకరించలేదు. తాను జగన్ వెంటే ఉంటానని తెగేసి చెప్పారు. జగన్ వెంట వెళ్లాలని కార్యకర్తలు చెబుతున్నారని తాను చెప్తే ముఖ్యమంత్రి కిరణ్ కుమార్ రెడ్డి బాధపడ్డారని శేషారెడ్డి మీడియా ప్రతినిధులతో చెప్పారు. కార్యకర్తలే తనకు అధిష్టానమని ఆయన చెప్పారు.

వైయస్ జగన్ పెట్టే పార్టీలో తాను చేరుతానని ఆయన స్పష్టం చేశారు. కాంగ్రెసు అధ్యక్షురాలు సోనియా గాంధీని ఢీకొని వైయస్ జగన్ విజయం సాధిస్తారని ఆయన దీమా వ్యక్తం చేశారు. వైయస్ జగన్ చెప్తే తాను శాసనసభా సభ్యత్వానికి రాజీనామా చేస్తానని ఆయన అన్నారు. వైయస్ జగన్ ఓదార్పు యాత్రను అనుమతించకుండా కాంగ్రెసు అధిష్టానం తప్పు చేసిందని ఆయన అన్నారు.