చంద్రబాబు కెంత చిన్నచూపో: మండిపడుతున్న తెలంగాణ వర్గాలు

హైదరాబాద్: గన్ పార్క్ వద్ద తెలంగాణ అమరవీరుల స్థూపంపైకి బూట్లతో ఎక్కిన తెలుగుదేశం పార్టీ అధ్యక్షుడు, మాజీ ముఖ్యమంత్రి చంద్రబాబునాయుడుపై తెలంగాణవాదులు, ప్రజా సంఘాలు తీవ్ర నిరసన వ్యక్తం చేస్తున్నాయి. చంద్రబాబుతో పాటు తెలుగుదేశం పార్టీకి చెందిన పలువురు శాసనసభ్యులు, నాయకులు అసెంబ్లీ ఎదుట ఉన్న తెలంగాణ అమరవీరుల స్థూపం దగ్గర ధర్నా చేశారు. ఈ సందర్భంగా వారు చెప్పులు, బూట్లతోనే స్థూపం ఎక్కారు. దీనిపై తెలంగాణవాదులు మండిపడుతున్నారు.

చంద్రబాబునాయుడికి తెలంగాణ అంటే ఎప్పుడూ చిన్నచూపే అని తెరాస శాసనసభ్యుడు వినయ భాస్కర్ ఆరోపించారు. చంద్రబాబు బూట్లతోనే అక్కడ నిలబడి తెలంగాణపై తనకున్న వ్యతిరేకతను మరోసారి నిరూపించుకున్నారన్నారు. చంద్రబాబు వెంటనే తెలంగాణ ప్రజలకు క్షమాపణ చెప్పాలని డిమాండ్ చేశారు. విద్యార్థులపై కేసుల ఎత్తివేత, పంట నష్టపోయిన రైతులకు పరిహారం విషయంలో ప్రభుత్వం వైఖరికి నిరసనగా తెలుగుదేశం పార్టీ సభ నుండి వాకౌట్ చేసి గన్ పార్కు వద్ద నిరసన తెలిపింది.