చిరంజీవి, చంద్రబాబులకు వైయస్ జగన్ రాజకీయ పోటు

మాజీ పార్లమెంటు సభ్యుడు వైయస్ జగన్ రాజకీయాలు కేవలం కాంగ్రెసు పార్టీకి మాత్రమే కాదు, తెలుగుదేశం పార్టీ అధ్యక్షుడు నారా చంద్రబాబునాయుడికి, ప్రజారాజ్యం పార్టీ అధ్యక్షుడు చిరంజీవికి కూడా తలనొప్పిగా పరిణమించాయి. కాంగ్రెసు పార్టీ నాయకులను మాత్రమే టార్గెట్ చేసుకుని జగన్ తన వైపు ఆకర్షించడానికి ప్రయత్నాలు సాగుతున్నట్లు ప్రస్తుతం కనిపిస్తోంది. కాంగ్రెసు ప్రధాన లక్ష్యం కాంగ్రెసే అయినప్పటికీ చంద్రబాబు తెలుగుదేశం పార్టీ కూడా ఆయనకు లక్ష్యంగానే ఉంటుంది. మాజీ శాసనసభ్యులు, ద్వితీయ శ్రేణి నాయకులు తెలుగుదేశం నుంచి వైయస్ జగన్ వైపు వెళ్లే అవకాశాలు ఎక్కువే ఉన్నాయి. తెలుగుదేశం నాయకత్వంతో ద్వితీయ శ్రేణి నాయకులు, కార్యకర్తలు తీవ్రంగా విసిగిపోయినట్లు తెలుస్తోంది. చంద్రబాబు పార్టీని క్రియాశీలం చేయడానికి ఎంతగా ప్రయత్నిస్తున్నప్పటికీ జిల్లా స్థాయిల్లో స్తబ్దంగానే ఉంటోంది. దీంతో ద్వితీయ శ్రేణి నాయకులు జగన్ వైపు చూస్తున్నట్లు చెప్పుకోవచ్చు.

కాంగ్రెసు నుంచి తన వైపు సాధ్యమైనంత ఎక్కువ మంది ఆకర్షిస్తూనే వైయస్ జగన్ తెలుగుదేశం పార్టీ వైపు దృష్టి సారించినట్లు సమాచారం. ఇప్పటికే కొంత మంది వైయస్ జగన్ తో సంప్రదింపులు జరుపుతున్నట్లు తెలుస్తోంది. ప్రజారాజ్యం పార్టీకి కూడా వైయస్ జగన్ తీవ్రమైన తలనొప్పిగా పరిణమించారు. పలువురు రాష్ట్రస్థాయి నాయకులు కూడా వైయస్ జగన్ వైపు చూస్తున్నట్లు వార్తలు వస్తున్నాయి. ప్రజారాజ్యం పార్టీకి భవిష్యత్తు లేదనే అభిప్రాయంతో చాలా మంది ఉన్నట్లు ప్రచారం జరుగుతోంది. ప్రజారాజ్యం పార్టీని ప్రత్యేకంగా బలహీనపరచాల్సిన అవసరం లేదని వైయస్ జగన్ ఉన్నట్లు చెబుతున్నారు. తాను పార్టీ పెట్టేలోగా ప్రజారాజ్యం పార్టీకి చెందినవారు తన వైపు వస్తారని ఆయన భావిస్తున్నట్లు చెబుతున్నారు.