జగన్ మాయల మరాఠీ, సిఎం కిరణ్ మాంత్రికుడు: జెసి

హైదరాబాద్: మాజీ పార్లమెంటు సభ్యుడు వైయస్ జగన్మోహన్ రెడ్డి మాయల మరాఠీ అని అలాంటి మాయల మరాఠీని ఎదుర్కోవాలంటే ముఖ్యమంత్రి కిరణ్ కుమార్ రెడ్డి బేతాళ మాంత్రికుడిగా మారాలని మాజీ మంత్రి జెసి దివాకర్ రెడ్డి సోమవారం అసెంబ్లీ ప్రాంగణంలో అన్నారు. కడప లోక్ సభ, పులివెందుల అసెంబ్లీ నియోజకవర్గాలకు జరిగే ఉప పోరులో కాంగ్రెసు పార్టీ విజయం సాధించాలంటే కిరణ్ కుమార్ రెడ్డి సాహసం చేయాలన్నారు. జగన్ మాయలు చేస్తాడని, ఆయన్ను అడ్డుకొని గెలవాలంటే కిరణ్ కుమార్ రెడ్డి ఇంకా ఎక్కువ మాయలు చేయాలన్నారు. ఉప పోరులో గెలుస్తామా అని తెలంగాణకు చెందిన మంత్రులు ప్రశ్నించినప్పుడు జెసి గెలుస్తామని ధీమా వ్యక్తం చేశారు.

మంత్రి డిఎల్ రవీంద్రారెడ్డి సైతం అప్పుడప్పుడు మధ్యలో నీటిలో చేపలా ఎగురుతున్నారన్నారు. అ వెంటనే నీళ్లలోకి వెళుతున్నారు. చేప ఎప్పుడైనా నీటిలోనే ఉండాల్సింది అన్నారు. రాష్ట్ర రాజకీయాల గురించి తాను మాట్లాడ దల్చుకోలేదని చెప్పారు. కాగా కడప నుండి వైయస్ జగన్ కు పోటీగా మంత్రి వైయస్ వివేకానందరెడ్డి, పులివెందుల నుండి జగన్ తల్లి విజయలక్ష్మిపై వివేకానంద కూతురు బరిలోకి దిగుతారేమో అని అభిప్రాయం వ్యక్తం చేశారు.