కెసిఆర్ దినపత్రిక నమస్తే తెలంగాణకు కోర్టులో చుక్కెదురు

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఆధ్వర్యంలో తెలంగాణ పత్రికగా వెలువడనున్న నమస్తే తెలంగాణ పత్రిక పేరును వినియోగించరాదంటూ రాష్ట్ర అత్యున్నత న్యాయస్థానం మంగళవారం మధ్యంతర ఉత్తర్వులు జారీ చేసింది. డాక్టర్ గోకా శ్రీధర్ అనే వ్యక్తి కోర్టులో పిటిషన్ దాఖలు చేశారు. మూడేళ్ల క్రితం 2007వ సంవత్సరంలో తాను నమస్తే తెలంగాణ పేరుకు దరఖాస్తు చేసుకున్నారని అధికారులు ఆ పేరును పరిశీలించిన అనంతరం అదే సంవత్సరం నవంబరు 30వ తేదిన ఆ పేరును ఇతరులకు కేటాయించామని చెప్పి దానిని తిరస్కరించారని, అయితే ఈ సెప్టెంబరులో అదే పేరును దామోదర రావు అనే వ్యక్తికి కేటాయించారని ఇది చట్ట విరుద్దమని, దురుద్దేశ్య పూర్వమని పిటిషనర్ గోకా శ్రీధర్ తరఫు న్యాయవాది చెప్పారు.

మూడు సంవత్సరాల క్రింద తన క్లయింటుకు తిరస్కరించి ఈ సంవత్సరం వేరే వారికి కేటాయించడం చట్ట విరుద్దమన్నారు. ఈ కేటాయింపు చెల్లదని ప్రకటించి పరిహారం ఇప్పించేలా ఆదేశాలివ్వలని కోరారు. ఈ పేరును వినియోగించడంపై కూడా తనకు స్టే ఇవ్వాలని కోరారు. విచారణ చేపట్టిన జస్టిస్ పి.వి.సంజయ్ కుమార్ వాదప్రతివాదాలు విన్న అనంతరం నమస్తే తెలంగాణ పేరును నిలిపివేయాలని మధ్యంతర ఉత్తర్వులు ఇచ్చారు. ఈ వ్యాజ్యంలో కేంద్ర సమాచారం, ప్రసార మంత్రిత్వశాఖ రిజిస్ట్రార్, స్పెషల్ బ్రాంచ్ పోలీసు జాయింట్ కమిషనర్, పోలీసు డిప్యూటీ కమిషనర్, దామోదరరావులకు నోటీసులు ఇచ్చారు.