చంద్రబాబు దీక్షకు తెలంగాణ మహా గర్జన దెబ్బ: రేపటికి వాయిదా

హైదరాబాద్: రైతు సమస్యలపై తెలుగుదేశం పార్టీ అధ్యక్షుడు నారా చంద్రబాబు నాయుడు తలపెట్టిన నిరవధిక నిరాహార దీక్షపై తెలంగాణ మహాగర్జన దెబ్బ పడింది. రైతు సమస్యల పరిష్కారానికి ప్రభుత్వం ముందుకు రాకపోవడాన్ని నిరసిస్తూ చంద్రబాబు గురువారం సాయంత్రం నుంచి నిరవధిక నిరాహార దీక్ష చేపట్టాలని అనుకున్నారు. అయితే, తెలంగాణ రాష్ట్ర సమితి (తెరాస) వరంగల్ లో నిర్వహించిన తెలంగాణ మహా గర్జన నేపథ్యంలో చంద్రబాబు తన నిర్ణయాన్ని వాయిదా వేసుకున్నారు.

చంద్రబాబు తన నిరవధిక నిరాహార దీక్షను రేపటికి (శుక్రవారానికి) వాయిదా వేసుకున్నట్లు పార్టీ వర్గాలు చెప్పాయి. తెలంగాణ మహా గర్జన ప్రాధాన్యాన్ని తగ్గించడానికే చంద్రబాబు నిరవధిక నిరాహార దీక్ష ప్రారంభించారనే అపవాదు వస్తుందనే ఉద్దేశంతో, అపవాదు రాకుండా చూడాలని పార్టీ వర్గాలు భావించాయి. దీంతో చంద్రబాబు తన నిరవధిక నిరాహార దీక్షను వాయిదా వేసుకున్నారు. తాను చేపట్టబోయే నిరాహార దీక్షపై చంద్రబాబు గురువారం మధ్యాహ్నం పార్టీ సీనియర్ నాయకులతో చర్చించారు. సాయంత్రం శాసనసభా పక్ష సమావేశంలో చర్చించారు.