వైయస్ జగన్ ఆస్తులపై ఐటి దాడులకు రంగం సిద్ధం?

హైదరాబాద్: పార్టీ పెట్టడానికి సిద్ధపడుతున్న పార్లమెంటు సభ్యుడు వైయస్ జగన్ పై ఎదురుదాడికి కాంగ్రెసు అధిష్టానం రంగం సిద్ధం చేసినట్లు తెలుస్తోంది. జగన్ ఆర్థిక మూలాలను దెబ్బ తీయాలనే ఉద్దేశంతో కేంద్ర ప్రభుత్వం ఉన్నట్లు సమాచారం. జగన్ కు చెందిన 15 సంస్థలపై ఏక కాలంలో దాడులు చేసేందుకు రంగం సిద్ధం చేసుకుంటున్నట్లు తెలుస్తోంది. ఆదాయం పన్ను శాఖ ఇప్పటికే వైయస్ జగన్ కు నోటీసులు జారీ చేసింది. వాటికి ఆయన సమాధానం కూడా ఇచ్చారు. అయితే ఆ సమాధానం సంతృప్తికరంగా లేదనే సాకుతో ఐటి దాడులు చేయాలని అనుకుంటున్నట్లు తెలుస్తోంది.

వైయస్ జగన్ కు చెందిన సాక్షి మీడియా పెట్టుబడులపై, భారతి సిమెంట్స్ లో షేర్ల వ్యవహారంపై ఐటి శాఖ ప్రధానంగా దృష్టి పెట్టే అవకశాలున్నాయని ప్రచారం జరుగుతోంది. అలాగే రఘురాం సిమెంట్స్ వ్యవహారాలపై కూడా ఆరా తీసే అవకాశాలున్నాయి. వైయస్ జగన్ పవర్ ప్రాజెక్టులు కూడా ఐటి శాఖ దృష్టిలో ఉన్నట్లు తెలుస్తోంది. ఈ ప్రమాదాన్ని పసిగట్టే వైయస్ జగన్ ముందస్తుగా కోట్లాది రూపాయలు ముందస్తు పన్ను చెల్లించారు. భారతీ షేర్ల వ్యవహారంలో ఏ విధమైన మతలబు లేదని ఆయన వివరణ ఇచ్చారు. తన కంపెనీలపై వస్తున్న ఆరోపణలపై వైయస్ జగన్ ఎప్పటికప్పుడు సాక్షి మీడియా ద్వారా ఎదురు దాడికి దిగుతూనే ఉన్నారు. తాను ప్రత్యక్షంగా మాట్లాడకుండా సాక్షి మీడియాలో వార్తాకథనాల రూపాల్లో వెల్లడి చేస్తున్నారు.