కాంగ్రెసు నుంచి వైయస్ జగన్ ఎగ్జిట్ తెలంగాణకు మంచిది: కెసిఆర్

హైదరాబాద్: కాంగ్రెసు నుంచి కడప పార్లమెంటు సభ్యుడు వైయస్ జగన్ వెళ్లిపోవడం తెలంగాణకు మంచిదని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు అభిప్రాయపడ్డారు. కోస్తా, రాయలసీమ ప్రాంతాల్లో వైయస్ జగన్ కాంగ్రెసును బలహీనపరుస్తారని, తెలంగాణ ప్రాంతంలో ఓట్ల కోసం కాంగ్రెసు అధిష్టానం ప్రత్యేక రాష్ట్రం ఇవ్వాల్సిన అనివార్యతలో పడుతుందని ఆయన బుధవారం సాయంత్రం మీడియాతో అన్నారు.

తాము వైయస్ జగన్ తో వెళ్తామని చాలా మంది పార్లమెంటు సభ్యులు, శాసనసభ్యులు అంటున్నారని, కనీసం తెలంగాణలోనైనా ఉనికి కాపాడుకోవాలని భావించి కాంగ్రెసు అధిష్టానం తెలంగాణ రాష్ట్ర ఏర్పాటుకు మొగ్గు చూపవచ్చునని ఆయన అన్నారు. ఉద్యమకారులుగా తాము ఉద్యమ తీవ్రతను పెంచుతామని, అది సివిల్ వార్ మాత్రమే కావాల్సిన అవసరం లేదని, శాంతిభద్రతలకు కూడా విఘాతం కలగవచ్చునని ఆయన అన్నారు. అవసరమైతే తుపాకులు కూడా పడుతామని ఆయన అన్నారు.