చంద్రబాబుపై విరుచుకుపడిన ముఖ్యమంత్రి కిరణ్ కుమార్ రెడ్డి

హైదరాబాద్: తెలుగుదేశం పార్టీ అధ్యక్షుడు నారా చంద్రబాబునాయుడిపై ముఖ్యమంత్రి కిరణ్ కుమార్ రెడ్డి తీవ్రంగా ధ్వజమెత్తారు. రైతు సమస్యలపై జరిగిన చర్చకు గురువారం శాసనసభలో ఆయన సమాధానమిస్తూ రైతు సమస్యలపై చంద్రబాబు రోడ్డుపై బైఠాయించడాన్ని తప్పు పట్టారు. రైతు సమస్యలపై రాజకీయాలు చేయవద్దని ఆయన సూచించారు. ముఖ్యమంత్రిగా వచ్చి 15 రోజులు కూడా కాలేదని, అప్పుడే కిరణ్ కుమార్ రెడ్డి నుంచి నేర్చుకావాలా అని చంద్రబాబు ఇటీవల చేసిన వ్యాఖ్యను ప్రస్తావిస్తూ చంద్రబాబు 9 ఏళ్ల పాలనలో రైతులకు 33 కోట్ల రూపాయలు విడుదల చేస్తే, తాను 15 రోజుల్లోనే 1500 కోట్ల రూపాయలు విడుదల చేశానని ఆయన చెప్పారు. టీవీ చానెళ్లలో, పత్రికల్లో కనిపించడానికి రైతుల కోసం పోరాడుతున్నట్లు చంద్రబాబు నమ్మించే ప్రయత్నం చేస్తున్నారని, చంద్రబాబును నమ్మబోరని ఆయన అన్నారు.

రైతు సమస్యలపై శాసనసభలో చర్చించాలని అంటే చర్చించకుండా చంద్రబాబు రోడ్డుపై బైఠాయించారని, చంద్రబాబు ఇలా ప్రవర్తించడం ఇది మొదటిసారి కాదని ఆయన అన్నారు. తెలంగాణలో ఉప ఎన్నికలు జరిగిన సందర్భంలో బాబ్లీ యాత్ర చేపట్టారని, దాని వల్ల ప్రభుత్వంపై 20 లక్షల రూపాయల భారం పడిందని, ప్రజల డబ్బును చంద్రబాబును, తెలుగుదేశం నాయకులను హైదరాబాదుకు విమానంలో తీసుకురావడానికి ఖర్చు చేయాల్సి వచ్చిందని ఆయన అన్నారు. రైతులు దుర్భరమైన పరిస్థితిని ఎదుర్కుంటుంటే రాజకీయం చేయడం సరి కాదని ఆయన అన్నారు. తాము వీలైనంత వరకు రైతులకు సహాయం చేస్తున్నామని, అయితే అది ఎక్కువ అని చెప్పడం లేదని, ఇంకా చేయాల్సి ఉందని, చేస్తామని ఆయన చెప్పారు.