వైయస్ జగన్ పై విరుచుకపడ్డ బాబాయ్ వైయస్ వివేకానంద రెడ్డి

విజయవాడ: అబ్బాయి వైయస్ జగన్ పై బాబాయ్ వ్యవసాయ శాఖ మంత్రి వైయస్ వివేకానంద రెడ్డి విరుచుకుపడ్డారు. పంట పొలాలను పరిశీలించడానికి శనివారం కృష్ణాజిల్లా కంచికచర్లకు వచ్చిన వైయస్ వివేకానంద రెడ్డిని మార్కెట్ యార్డులో వైయస్ జగన్ అభిమానులు అడ్డుకున్నారు. వైయస్ జగన్ కు ఎందుకు మద్దతివ్వరంటూ వారు వివేకానంద రెడ్డిని నిలదీసే ప్రయత్నం చేశారు. ఈ సమయంలో కాంగ్రెసు కార్యకర్తలకు, వైయస్ జగన్ అభిమానులకు మధ్య తోపులాట చోటు చేసుకుంది. జగన్ అభిమానులపై పోలీసులు లాఠీచార్జీ చేశారు.

ఆ తర్వాత మీడియా సమావేశంలో వైయస్ వివేకానంద రెడ్డి వైయస్ జగన్ పై తీవ్ర వ్యాఖ్యలు చేశారు. వైయస్ జగన్ ప్రతిపక్షంలో భాగమని, ప్రతిపక్ష నాయకుడిగా జగన్ ధర్నాలు, నిరాహార దీక్షలు చేసుకోవచ్చునని, కానీ రైతు సమస్యలపై రాజకీయం చేయవద్దని ఆయన అన్నారు. రైతు సమస్యలపై తెలుగుదేశం పార్టీ అధ్యక్షుడు నారా చంద్రబాబు నాయుడు, వైయస్ జగన్ రాజకీయం చేస్తున్నారని ఆయన విమర్శించారు. రైతులను రాష్ట్ర ప్రభుత్వం పూర్తిగా ఆదుకుంటుందని ఆయన హామీ ఇచ్చారు.