చంద్రబాబు నిరాహార దీక్ష భగ్నం, అరెస్టు: నిమ్స్ లో కొనసాగింపు

హైదరాబాద్‌: తెలుగుదేశం అధినేత చంద్రబాబునాయుడు రైతు సమస్యలపై మూడు రోజులుగా చేస్తున్న నిరవధిక దీక్షను పోలీసులు భగ్నం చేశారు. సోమవారం తెల్లవారుజామున హైదరాబాదులోని న్యూఎమ్మెల్యే క్వార్టర్స్‌కు చేరుకున్న టాస్క్‌ఫోర్స్‌ పోలీసులు చంద్రబాబు చేత బలవంతంగా దీక్ష విరమింపచేశారు. అడ్డు వచ్చిన పార్టీ నేతల్ని, కార్యకర్తల్ని, ఆఖరికి చంద్రబాబు కుమారుడు లోకేష్‌కు కూడా దీక్షా వేదిక నుంచి కిందకు నెట్టి అదుపులోకి తీసుకున్నారు. దీంతో ఆ ప్రాంతంలో ఉద్రిక్త వాతావరణం నెలకొంది. తీవ్ర ప్రతిఘటనల అనంతరం బాబు ప్రత్యేక వాహనంలో నిమ్స్‌కు తరలించారు. ఆదివారం రాత్రి నుంచే పలుమార్లు దీక్ష భగ్నం చేయడానికి పోలీసులు యత్నించినా కుదరలేదు. ఉదయం 4గంటల సమయంలో దీక్షా శిబిరాన్ని పూర్తిగా అదుపులోకి తీసుకున్న తర్వాత చంద్రబాబును కలసి తమకు సహకరించాల్సిందిగా కోరారు.

తనను తీసుకెళ్లడానికి వీల్లేదంటూ చంద్రబాబు పోలీసులతో వాగ్వాదానికి దిగారు. పలుమార్లు పోలీసులు విజ్ఞప్తి చేసినా బాబు మౌనం వహించారు. అనంతరం రంగంలోకి దిగిన పోలీస్‌ ఉన్నతాధికారి సబర్వాల్‌ చంద్రబాబు నచ్చజెప్పే యత్నం చేశారు. తన ఆరోగ్యం సరిగానే ఉందని తాను దీక్ష చేసేందుకు పోలీసులు సహకరించాలని బాబు చేతులు జోడించి విజ్ఞప్తి చేశారు. ఎంత చెప్పినా బాబు వినకపోవడంతో పోలీసులు బలవంతంగా దీక్షను భగ్నం చేసి నిమ్స్‌లోని ఎమర్జెన్సీ వార్డుకు తరలించారు. నిమ్స్ లో చంద్రబాబు దీక్ష కొనసాగిస్తున్నట్లు తెలుగుదేశం పార్టీ నాయకులు చెప్పారు. చంద్రబాబును అరెస్టు చేసేందుకు ఆదివారం రాత్రి నుంచే ప్రయత్నాలు సాగించారు. మూడు సార్లు కార్యకర్తలు పోలీసులను అడ్డుకున్నారు. రెండు సార్లు పోలీసులు లాఠీచార్జీ చేశారు.