చంద్రబాబు అరెస్టులో రాజకీయ కుట్ర లేదు: సబితా ఇంద్రారెడ్డి

హైదరాబాద్‌: నిరాహార దీక్ష చేస్తున్న ప్రతిపక్ష నేత నారా చంద్రబాబు నాయుడు అరెస్టులో రాజకీయ కుట్ర గానీ కక్ష గానీ ఏమీ లేదని రాష్ట్ర హోం మంత్రి సబితా ఇంద్రారెడ్డి స్పష్టం చేశారు. ప్రతిపక్ష నాయకుడు దీక్ష చేస్తున్నప్పుడు తమ చేయాల్సిన పని తాము చేయాల్సి ఉంటుందని ఆమె అన్నారు. దేశంలో ఏ రాష్ట్రంలో కూడా ఇవ్వనంత ప్యాకేజీ రాష్ట్ర ప్రభుత్వం రైతులకు ఇచ్చిందని ఆమె సోమవారం మీడియా ప్రతినిధుల సమావేశంలో చెప్పారు. చంద్రబాబు వైద్యులు అందించే చికిత్స తీసుకోవాలని ఆమె కోరారు. చంద్రబాబు ప్రభుత్వ హయాంలో రైతులకు ఏం చేశారో అందరికీ తెలుసునని ఆమె వ్యాఖ్యానించారు. ప్రభుత్వం ప్రకటించిన సహాయం రైతులకు సరిగా అందేలా సహకరించాలని, రైతులకు సహాయం అందించడానికి సూచనలు ఇవ్వాలని ఆమె విజ్ఞప్తి చేశారు.

చంద్రబాబు ఆరోగ్యాన్ని, ప్రాణాలను కాపాడాల్సిన బాధ్యత ప్రభుత్వానికి ఉందని, అందుకే చంద్రబాబును ఆస్పత్రికి తరలించామని ఆమె చెప్పారు. రైతుల పట్ల ప్రభుత్వం బాధ్యతగా వ్యహరించిందని ఆమె చెప్పారు. రైతులకు సరైన సహాయం అందించలేదని భావిస్తే నిరసన తెలిపే హక్కు చంద్రబాబుకు ఉంటుందని, 9 ఏళ్లు ముఖ్యమంత్రిగా పనిచేసిన చంద్రబాబు దీక్ష చేస్తుంటే తాము తగిన చర్యలు తీసుకోవాల్సి ఉంటుందని, తాము అదే పని చేశామని ఆమె అన్నారు.