ప్రభుత్వం, స్సీకర్ లపై అవిశ్వాస తీర్మానం ప్రతిపాదిస్తాం: టిడిపి నేతలు

హైదరాబాద్‌: రైతుల కోసం దీక్ష చేస్తున్న తమ పార్టీ అధినేత చంద్రబాబును బలవంతగా దీక్ష విరమింపచేయడం దుర్మార్గపు చర్యగా తెలుగుదేశం నాయకులు అభివర్ణించారు. తప్పుడు నివేదికలు సృష్టించి దీక్ష భగ్నం చేశారని వారు మండిపడ్డారు. ఆరోగ్యం బాగానే ఉందని బాబు విజ్ఞప్తి చేసినా, వినకుండా బలవంతంగా తీసుకెళ్లడం అన్యాయమన్నారు. మరోపక్క బాబు దీక్ష భగ్నానికి నిరసనగా పార్టీ క్యారకర్తలు ముఖ్యమంత్రికి వ్యతిరేకంగా నినాదాలు చేశారు. ప్రభుత్వంపై, శాసనసభ స్పీకర్ పై అవిశ్వాస తీర్మానం ప్రతిపాదిస్తామని తెలుగుదేశం నాయకులు పయ్యావుల కేశవ్, ఎర్రబెల్లి దయాకర్ రావు చెప్పారు. కిరణ్ కుమార్ రెడ్డి ఫాక్షన్ నాయకుడిగా వ్యవహరిస్తున్నారని వారు విమర్శించారు.

ప్రభుత్వ అధికారిక పత్రాలు చూపకుండా చంద్రబాబు దీక్షను భగ్నం చేయడం దారుణమని సీనియర్‌ నేత యనమల రామకృష్ణుడు అన్నారు. ఆరోగ్యం బాగుంది దీక్షకు సహకరించమని చేతులు జోడించి అడిగినా పోలీసులు దీక్ష భగ్నం చేశారని మరో సీనియర్‌ నేత ఎర్రన్నాయుడు ఆగ్రహం వ్యక్తం చేశారు. రాష్ట్ర బంద్‌కు అన్ని వర్గాలు సహకరించాలని ఎర్రన్నాయుడు కోరారు. చంద్రబాబును అరెస్టు చేసే విధానం ఎమర్జెన్సీని తలపిస్తోందని తెదేపా ఎర్రబెల్లి దయాకరరావు అన్నారు. సీనియర్‌ నేతలు ఎర్రన్నాయుడు, కడియం శ్రీహరి, దేవేందర్‌గౌడ్‌, యనమల రామకృష్ణుడు తదితరులు నిమ్స్‌లో చంద్రబాబును పరామర్శించారు.