సోనియా ఎదుట ఎఐసిసి ప్లీనరీ సమావేశాల్లో తెలంగాణ నినాదాలు

న్యూఢిల్లీ: సోనియా ఎదుట ఎఐసిసి ప్లీనరీ సమావేశాల్లో తెలంగాణ నినాదాలు మారుమ్రోగాయి. కాంగ్రెసు తెలంగాణ పార్లమెంటు సభ్యులు తెలంగాణ రాష్ట్రం ఏర్పాటు ఆవశ్యకతను ప్లీనరీ సమావేశంలో తెలిపారు. తెలంగాణను ఆదుకోవాలని కరీంనగర్ పార్లమెంటు సభ్యుడు పొన్నం ప్రభాకర్ కాంగ్రెసు అధ్యక్షురాలు సోనియా గాంధీని కోరారు. ఇచ్చిన తెలంగాణను వెనక్కి తీసుకుంటే సోనియా క్రెడిబిలిటీ పోతుందని ఆయన అన్నారు. తెలంగాణపై నిర్ణయం తీసుకోవాల్సిన సమయం వచ్చిందని, వెంటనే తెలంగాణ ఏర్పాటుకు నిర్ణయం తీసుకోవాలని ఆయన కోరారు.

కాగా, మరో పార్లమెంటు సభ్యుడు సర్వే సత్యనారాయణ కూడా తెలంగాణ రాష్ట్ర ఏర్పాటు కోసం తన గళం విప్పారు. శ్రీకృష్ణ కమిటీ నివేదిక 99.9 శాతం తెలంగాణకు అనుకూలంగా ఉండాలని ఆయన అన్నారు. కమిటీ నివేదిక ఎలా తెలంగాణ రాష్ట్ర ఏర్పాటుకు చర్యలు తీసుకోవాలని ఆయన సూచించారు. తెలంగాణ రాష్ట్ర ఏర్పాటును ఎవరైనా అడ్డుకోవాలని చూస్తే ఖబడ్దార్ అని ఆయన హెచ్చరించారు.