రైతుల కోసం పోరాడితే రాజకీయమా: బాబు అరెస్టుపై వెంకయ్యనాయుడు

హైదరాబాద్‌: రైతుల సమస్యలు పరిష్కరించాలని కోరుతున్న తెలుగుదేశం పార్టీ అధ్యక్షుడు, మాజీ ముఖ్యమంత్రి చంద్రబాబునాయుడి అరెస్టును భారతీయ జనతా పార్టీ సీనియర్ నాయకులు వెంకయ్యనాయుడు, రాష్ట్ర అధ్యక్షులు కిషన్ రెడ్డి, మాజీ అధ్యక్షుడు బండారు దత్తాత్రేయ సోమవారం ఖండించారు. చంద్రబాబును పోలీసులు అరెస్టు చేసిన విధానాన్ని తాము ఖండిస్తున్నట్టు చెప్పారు. పూర్తిగా తెల్లవారకముందే అరెస్టు చేయడం కాకుండా మాజీ ముఖ్యమంత్రిని, ఆయన కొడుకుపై దౌర్జన్యంగా వ్యవహరిస్తూ అరెస్టు చేయడం దారుణమన్నారు.

చంద్రబాబు దీక్ష విరమింప చేయడానికి ఆయనతో చర్చలు జరుపకుండా అరెస్టు చేయడం సరికాదన్నారు. తీవ్ర నష్టాల్లో ఉన్న రైతులపక్షాన పోరాడటం రాజకీయం ఎలా అవుతుందని వారు ప్రశ్నించారు. రైతుల సమస్యలను కేంద్రం దృష్టికి తీసుకు వెళ్లడంలో కాంగ్రెస్ పార్లమెంటు సభ్యులు, మంత్రులు విఫలమయినందువల్లనే చంద్రబాబు దీక్ష చేపట్టారన్నారు. కాంగ్రెస్ ప్రభుత్వానికి రైతుల సమస్యలపై చిత్తశుద్ది ఉంటే వారికి సరియైన సాయం అందించాలని డిమాండ్ చేశారు.