వైయస్ జగన్ కు బాసటగా ఉండడానికే వచ్చా: జయసుధ

విజయవాడ: వైయస్ జగన్ కు బాసటగా ఉండడానికే తాను దీక్ష ప్రాంగణానికి వచ్చినట్లు కాంగ్రెసు సికింద్రాబాద్ శానససభ్యురాలు జయసుధ చెప్పారు. వైయస్ జగన్ దీక్ష ప్రాంగణం వేదిక నుంచి ఆమె మంగళవారం మాట్లాడారు. ఇప్పుడు ఎక్కడ చూసినా జగన్ గురించే చర్చ జరుగుతోందని ఆమె అన్నారు. తనకు రాజకీయాలు తెలియవని, వైయస్సార్ వల్లనే తాను శాసనసభ్యురాలిగా ఎన్నికయ్యానని ఆమె అన్నారు.

వైయస్ జగన్ ను ప్రజానాయకుడిగా ఆమె అభివర్ణించారు. వైయస్ జగన్ లో గుండె ధైర్యం, ఆత్మవిశ్వాసం ఉందని, యువకులకు ఉండాల్సిందే ఆ లక్షణాలని ఆమె అన్నారు. వైయస్ జగన్ ను యువత ఉన్నత స్థానంలో నిలబెడుతుందని ఆశిస్తున్నట్లు ఆమె తెలిపారు. తాను మనస్ఫూర్తిగా వైయస్ జగన్ కు బాసటగా నిలుస్తున్నట్లు ఆమె చెప్పారు.