వైయస్ జగన్ ఎన్టీఆర్ లా ఢిల్లీని గడగడలాడిస్తున్నారు: లక్ష్మీపార్వతి

విజయవాడ: వైయస్ జగన్ ఢిల్లీని గడగడలాడిస్తున్నారని ఎన్టీఆర్ తెలుగుదేశం అధ్యక్షురాలు లక్ష్మీపార్వతి అన్నారు. గతంలో ఎన్టీఆర్ ఢిల్లీని గడగడలాడిస్తున్నారని, ఇప్పుడు వైయస్ జగన్ గడగడలాడిస్తున్నారని ఆమె అన్నారు. వైయస్సార్ వారసుడు వైయస్ జగన్ ఒక్కరే అని ఆమె అన్నారు. తెలుగు పౌరుషం వెల్లువలా, ఉప్పెనలా వస్తోందని, దానితో అన్ని పార్టీలు కొట్టుకుపోయి జగన్ పార్టీ మాత్రమే మిగులుతుందని ఆమె అన్నారు. వైయస్ జగన్ దీక్షా ప్రాంగణం వేదిక నుంచి ఆమె మంగళవారం ప్రసంగించారు. తండ్రి సాహసం వైయస్ జగన్ లో కనిపిస్తోందని ఆమె అన్నారు. తండ్రి అడుగుజాడల్లో నడవడానికి ఆత్మాభిమానాన్ని నిలబెట్టుకోవడానికి, తెలుగు పౌరుషం నిలబెట్టడానికి వైయస్ జగన్ ఢిల్లీని సవాల్ చేస్తున్నారని ఆమె అన్నారు.

తెలుగుదేశం పార్టీ అధ్యక్షుడు నారా చంద్రబాబునాయుడిపై ఆమె తీవ్రంగా ధ్వజమెత్తారు. చంద్రబాబు దీక్షను ఎద్దేవా చేశారు. పోలీసులు అరెస్టు చేయకపోతే మరో రోజులో చంద్రబాబు బిచాణా ఎత్తేసేవాడని ఆమె అన్నారు. చంద్రబాబుకు రైతుల నుంచి మద్దతు లభించడం లేదని ఆమె అన్నారు. పులిని చూసి నక్క వాత పెట్టుకున్నట్లు చంద్రబాబు దీక్ష చేపట్టారని ఆమె వ్యాఖ్యానించారు. తన ప్రభుత్వ హయాంలో చంద్రబాబు నీరివ్వకుండా డెల్టాను ఎండగట్టారని ఆమె అన్నారు.