చిరంజీవికి మరో ఎమ్మెల్యే కాటం రాంరెడ్డి షాక్, జగన్ బాట

కర్నూలు‌: ప్రజారాజ్యం పార్టీ అధ్యక్షుడు చిరంజీవికి మరో శాసనసభ్యుడు కాటం రాంరెడ్డి షాక్ ఇచ్చారు. ఆయన వైయస్ జగన్ పార్టీలో చేరడానికి సిద్ధపడ్డారు. ఇప్పటికే శోభానాగిరెడ్డి వైయస్ జగన్ శిబిరంలో చేరిపోయారు. ఆమె మంగళవారం వైయస్ జగన్ దీక్షలో కూడా పాల్గొన్నారు. వైయస్ జగన్ లక్ష్యదీక్షకు సంఘీభావంగా కర్నూలు జిల్లాలోని సంజమాలలో ఆయన అభిమానులు చేపట్టిన దీక్షలో కాటం రాంరెడ్డి పాల్గొని తన మద్దతు తెలిపారు. వైయస్ జగన్ ముఖ్యమంత్రి అయితేనే రైతుల కష్టాలు తీరుతాయని ఆయన అన్నారు.

కాగా, వైయస్ జగన్ తో కాటం రాంరెడ్డి సోమవారమే భేటీ అయ్యారు. వైయస్ జగన్ సోమవారం ప్రజారాజ్యం పార్టీ నేత భూమా నాగిరెడ్డి, శాసనసభ్యురాలు శోభా నాగిరెడ్డి ఇంటికి వెళ్లారు. ఆ సమయంలో కాటం రాంరెడ్డి కూడా వచ్చారు. తాను జగన్ పార్టీ వెంటనే ప్రజారాజ్యం పార్టీకి, శాసనసభ సభ్యత్వానికి రాజీనామా చేస్తానని ఆయన చెప్పారు. కాంగ్రెసు శాసనసభ్యుడు కాటసాని రాంభూపాల్ రెడ్డి కూడా ఆ భేటీలో పాల్గొన్నారు.