విజయవాడకు చేరుకున్న వైయస్ జగన్: దీక్షకు సిద్ధం

విజయవాడ: రైతు సమస్యలపై 48 గంటల పాటు నిరాహార దీక్ష చేపట్టడానికి మాజీ పార్లమెంటు సభ్యుడు వైయస్ జగన్ విజయవాడ చేరుకున్నారు. మంగళవారం ఉదయం ఆయన విజయవాడలోని స్టేట్ గెస్ట్ హౌస్ కు చేరుకున్నారు. ఆయనను మాజీ మంత్రి కొణతాల రామకృష్ణ, మేకపాటి తదితరులు కలుసుకున్నారు. మాజీ మంత్రి ముద్రగడ పద్మనాభం, సినీనటుడు విజయ్ చందర్ తదితరులు విజయవాడకు చేరుకున్నారు.

రాష్ట్రంలోని వివిధ ప్రాంతాల నుంచి జగన్ లక్ష్యదీక్షకు సంఘీభావంగా దీక్ష చేయడానికి ప్రజలు చేరుకుంటున్నారు. వైయస్ జగన్ దీక్ష చేపట్టే వేదికను 10 అడుగుల ఎత్తున నిర్మించారు. వివిధ ప్రాంతాలకు చెందిన జగన్ అభిమానులు దీక్ష చేపట్టడానికి కూడా ఏర్పాట్లు జరిగాయి. జగన్ దీక్షకు మద్దతుగా తూర్పు గోదావరి జిల్లా తునిలో రిలే నిరాహార దీక్ష చేపట్టారు.