చంద్రబాబు దీక్ష విరమణకు అన్ని పార్టీలు సహకరించాలి: సిఎం కిరణ్

హైదరాబాద్: దేశంలో ఏ రాష్ట్రం ఇవ్వలేని అత్యంత మంచి ప్యాకేజిని రాష్ట్రంలో ప్రకటించామని ముఖ్యమంత్రి కిరణ్ కుమార్ రెడ్డి గురువారం అఖిలపక్షం అనంతరం అన్నారు. అకాల వర్షాల వల్ల రైతులు తీవ్రంగా నష్టపోయారన్నారు. విపత్తు దృష్ట్యా కేంద్ర సాయాన్ని రాష్ట్ర ప్రభుత్వం కోరిందన్నారు. త్వరలోనే రాష్ట్రానికి కేంద్ర బృందం రానుందని చెప్పారు. ఆ బృందం వచ్చిన అనంతరం నష్టం అంచనాలు పూర్తయ్యాక మరోసారి కేంద్రానికి సాయం కోసం విజ్ఞప్తి చేస్తామని చెప్పారు. రాష్ట్రానికి సాయం ఇవ్వడానికి కేంద్రం కూడా సిద్ధంగా ఉందన్నారు.

మాజీ ముఖ్యమంత్రి, తెలుగుదేశం పార్టీ అధ్యక్షుడు చంద్రబాబు దీక్షను విరమింపచేయడానికి అన్ని పార్టీలు సహకరించాలని ముఖ్యమంత్రి కోరారు. కాగా అంతకుముందు అఖిలపక్షం సమావేశం నుండి తెలుగుదేశం, వామపక్షాలు వాకౌట్ చేశాయి. రైతులు ఆత్మహత్యలకు పాల్పడవద్దని విపక్షాలు చేసే ఉద్యమంలో పాల్గొనాలని వివిధ పార్టీ నాయకులు రైతులను కోరారు. చంద్రబాబు సైతం దీక్ష విరమించుకోవాలని వారు కోరారు.