నిరాహార దీక్ష విరమించండి: చంద్రబాబుకు శంకరరావు వినతి

హైదరాబాద్‌: నిరాహార దీక్ష విరమించాలని రాష్ట్ర చేనేత శాఖ మంత్రి పి. శంకర రావు తెలుగుదేశం పార్టీ అధ్యక్షుడు నారా చంద్రబాబు నాయుడిని కోరారు. ఆయన గురువారం చంద్రబాబును నిజాం వైద్య విజ్ఞాన సంస్థ (నిమ్స్)లో పరామర్శించారు. చంద్రబాబు ఆరోగ్యాన్ని కాపాడాల్సిన బాధ్యత అందరిపై ఉందని, ఈ విషయాన్ని తాను ముఖ్యమంత్రికి తెలియజేస్తానని ఆయన మీడియా ప్రతినిధులతో అన్నారు. చంద్రబాబు దీక్ష విరమిస్తే అందరం కలిసి రైతుల కోసం పనిచేద్దామని ఆయన అన్నారు.

చంద్రబాబు ఆరోగ్యాన్ని గంట గంటకూ పర్యవేక్షించాలని ఆయన వైద్యులను ఆదేశించారు. రైతులు సర్వం కోల్పోయారనే విషయం అందరికీ తెలుసునని, రైతుల కోసం అందరం కలిసి పని చేయాల్సిన అవసరం ఉందని ఆయన అన్నారు. చంద్రబాబు ఆరోగ్యం ఆందోళనకరంగా ఉందని ఆయన చెప్పారు. చంద్రబాబు దీక్షపై భిన్నాభిప్రాయం లేదని ఆయన అన్నారు.