వైయస్ జగన్ పార్టీ కన్నా తెలుగుదేశం వంద రెట్లు బెటర్: డిఎల్ రవీంద్రారెడ్డి

హైదరాబాద్: మాజీ పార్లమెంటు సభ్యుడు, దివంగత ముఖ్యమంత్రి వైయస్ రాజశేఖరరెడ్డి తనయుడు వైయస్ జగన్మోహన్ రెడ్డి పెట్టబోయే పార్టీ కంటే తెలుగుదేశం పార్టీయే వందరెట్లు ఉన్నతమైనదని ఆరోగ్యశాఖ మంత్రి డిఎల్ రవీంద్రారెడ్డి గురువారం విలేకరుల సమావేశంలో అన్నారు. గతంలో తన బాబాయ్ వైయస్ వివేకానందకు మంత్రి పదవి కావాలని పట్టుబట్టిన జగన్ ఆయనకు మంత్రి పదవి ఇచ్చాక మాత్రం తట్టుకోలేక పోతున్నారన్నారు. జగన్ లక్ష్యదీక్షతో వచ్చే నష్టమేమీ లేదన్నారు.

రైతాంగ సమస్యలపై నిరవధిక నిరాహార దీక్ష చేస్తున్న తెలుగుదేశం పార్టీ అధ్యక్షుడు చంద్రబాబునాయుడు పరిస్థితి ఆందోళనగా ఉందన్నారు. ప్రభుత్వం ఎంతగా చెప్పినా చంద్రబాబు వైద్యానికి నిరాకరిస్తున్నారన్నారు. కోర్టు తీర్పుతో బలవంతంగా నైనా ఆయన దీక్షను విరమింప చేస్తామని డిఎల్ చెప్పారు.