విద్యార్థులపై పెట్టిన కేసుల ఎత్తివేతను ప్రారంభించిన ప్రభుత్వం

హైదరాబాద్: తెలంగాణ, సమైక్యాంధ్ర ఉద్యమాల సందర్భంగా విద్యార్థులపై పెట్టిన కేసుల ఎత్తివేతను రాష్ట్ర ప్రభుత్వం ప్రారంభించింది. హింసకు సంబంధం లేని కేసులను ఎత్తివేస్తూ న్యాయశాఖ ఉత్తర్వులు జారీ చేసింది. విద్యార్ధులపై కేసులు ఎత్తివేస్తున్నట్లు ప్రభుత్వం ప్రకటించినట్లుగానే బుధ, గురువారాల్లో సుమారు 127 జీవోలను జారీ చేసింది. ఇటీవల శాసనసభ శీతాకాల సమావేశాల్లో హోంమంత్రి సబితా ఇంద్రారెడ్డి విద్యార్ధులపై కేసుల ఎత్తివేతపై ప్రకటన చేసిన విషయం విదితమే. గురువారం కేసులకు సంబంధించి 56 జీవోలు జారీ అయినట్లు తెలియవచ్చింది.

ప్రత్యేక తెలంగాణ విషయమై రాష్ట్రవ్యాప్తంగా జరిగిన ఉద్యమంలో కేసులు నమోదై అరెస్టు అయిన విద్యార్ధులు మొదటి విడతగా సుమారు రెండు వేల మంది విడుదల అయ్యే అవకాశం ఉన్నట్లు సమాచారం. హింసాత్మకంగా జరిగిన కేసులను సమీక్షించిన తర్వాత నిర్ణయం తీసుకునే అవకాశం ఉన్నట్లు తెలియవచ్చింది.